युरोकप जुन ११ बाट, कुन समूहमा कुन टिम ?

एजेन्सी । अर्को वर्ष आयोजना हुने युरोकप फुटबलमा सहभागिता जनाउने सबै २४ टिमको टुंगो लागेको छ ।

बिहीबार राति भएको छनोटको प्लेअफबाट ४ टिमले युरोकपमा स्थान बनाएसँगै २४ टिमको टुंगो लागेको हो ।

युरोकपमा छनोट हुने अन्तिम चार टिममा स्कटल्याण्ड, स्लोभाकिया, हंगेरी र नर्थ म्यासेडोनिया रह्यो ।

कोरोना भाईरसको महामारीको कारण एक वर्ष पछि सरेको युरोकप २०२१ को जुन ११ बाट जुलाई ११ सम्म हुनेछ ।

युरोकप युरोपको विभिन्न देशको १२ शहरमा आयोजना हुनेछ । प्रतियोगिता सुरु भएको ६० वर्ष पुगेको अवसरमा युरोपका १२ शहरमा प्रतियोगिता आयोजना गर्न लागिएको हो ।

यस अघि युरोकप सन् २०२० को जुन १२ देखि जुलाई १२ सम्म हुने तय थियो । तर, कोरोनाले युरोपको अधिकांस राष्ट्रमा महामारीको रुप लिएपछि प्रतियोगिता सारिएको हो ।

यूईएफएले युरोकप लण्डन, आम्स्टरडाम, बाकु, बिल्बाओ, बुचारेस्ट, बुडापेस्ट, कोपनहेगन, डुब्लीन, ग्लासगो, म्युनिख, रोम र सेन्ट पिटर्सवर्गमा आयोजना गर्ने तयारी गरेको छ ।

युरोकपको उद्घाटन खेलमा टर्की र इटाली भिड्ने छन् । जुन ११ मा हुने उद्घाटन खेल इटालीको रोममा हुनेछ ।

कुन समूहमा कुन टिम ?

समूह ए - इटाली, टर्की, वेल्स, स्विजरल्याण्ड

समूह बी - डेनमार्क, फिनल्याण्ड, बेल्जियम, रसिया

समूह सी - नेदरल्यान्ड्स, युक्रेन, अस्ट्रिया, नर्थ म्यासेडोनिया

समूह डी - इंग्ल्यान्ड, क्रोएसिया, स्कटल्याण्ड, चेक रिपब्लिक

समूह ई - स्पेन, स्विडेन, पोल्याण्ड, स्लोभाकिया

समूह एफ - हंगेरी, पोर्चुगल, फ्रान्स, जर्मनी