'फिटनेसमा सुधार आएको छ'

काठमाडौं । नेपाल राष्ट्रिय पुरुष फुटबल टिमका कार्यकारी प्रशिक्षक बाल गोपाल महर्जनले नेपाली टोलीका खेलाडीको फिटनेसमा सुधार आएको बताएका छन् ।

बंगलादेशसँगको मैत्रीपूर्ण खेलका लागि बंगलादेश जानु अघि प्रशिक्षक महर्जनले आफ्ना खेलाडीको फिटनेसमा केहि हदसम्म सुधार आएको बताएका हुन् ।

‘पहिलो अभ्यास सत्रमा जुन कमी कमजोरी थिए । कम्बिनेसनको अभ्यास भईरहेको थिएन । केहि समस्या देखिएको थियो । यो हप्ताको अभ्यासले केहि हदसम्म सुधार भएको छ । फिटनेसमा सुधार आएको छ,' तेस्रो पटक नेपाली टिम सल्हालेका प्रशिक्षक महर्जनले भने, 'प्राविधिक र शारिरीक रुपमा पनि केहि हदसम्म सुधार आएको छ ।’

नेपालले कात्तिक २८ र मंसिर २ गते बंगलादेशसँग दुई मैत्रीपूर्ण खेल खेल्नेछ । खेल ढाकास्थित बंगबन्धु रंगशालामा हुनेछ ।

बंगलादेशसँगको खेलका लागि नेपाली टिम बिहीबार बिहान ढाका प्रस्थान गरिसकेको छ । नेपाली टिम ढाका पुगेपछि केहि दिन क्वारेन्टिनमा बस्नेछ र एक हप्ता प्रशिक्षणमा सामेल हुनेछन् ।

मुख्य प्रशिक्षक योहान कालिन स्विडेनमा रहेको कारण एन्फाले महर्जनलाई टिम हेर्ने जिम्मेवारी दिएको हो । कोरोना भाईरसको महामारीको कारण स्विडेन सरकारले भ्रमणमा कडाई गरेपछि कालिन नेपाल फर्कन नपाएको एन्फाले जनाएको छ ।

महर्जनले ढाकामा हुने थप एक हप्ताको प्रशिक्षणले टोलीको फिटनेस फर्कनेमा आफु आशावादी भएको समेत बताए ।

‘हामीलाई त्यहाँ एक हप्ता अभ्यास गर्ने मौका रहेको छ । समय भएका कारण खेलाडी फिट हुन्छ भन्नेमा आशा लागेको छ,’ नेपाललाई ढाकामै बंगबन्धु गोल्डकपको उपाधि दिलाएका प्रशिक्षक महर्जनले भने ।

बंगलादेशसँगको मैत्रीपूर्ण खेलका लागि नेपालले कात्तिक १३ गतेबाट प्रशिक्षण थालेको हो । राष्ट्रिय खेलकुद परिषद (राखेप) ले स्वीकृति दिएपछि एन्फाले टिमको तयारी गरेको हो ।

यस्तै टिमका केहि मुख्य सदस्य बंगलादेश गएका छैनन् । जसले महर्जनलाई समस्या थपिदिएको छ ।

टिममा रहेका मध्ये ७ खेलाडी कोरोना पोजेटिभ देखिएपछि बंगलादेश गएका छैनन् । यस्तै चोटका कारण टिमका भरपर्दा मिडफिल्डर रोहित चन्द समेत बंगलादेश गएका छैनन् ।

बंगलादेश जाने टिममा ८ नयाँ खेलाडी रहेका छन् । त्यसैले केहि खेलाडीले राष्ट्रिय टिममा डेब्युको मौका पाउने सम्भावना रहेको छ ।

‘यो मेरो लागि नौलो अवसर हो । कोभिडले नौलो अवसर बनायो । खेलाडी छनोट गर्ने काम निकै गाह्रो हुन्थ्यो । यस समय भने कोरोनालेनै खेलाडी छनोट गरेको छ । तर, एक प्रकारले कठिन पनि भईरहेको छ,' प्रशिक्षक महर्जनले भने, 'सिनियर र अनुभबी तथा पहिलो रोजाईका खेलाडी समेत संक्रमित हुँदा कठिनाई छ । तर, टिम गेम भएकाले समस्या भएपनि धेरै समस्या नहोला ।’

फिफा विश्वकप छनोटको दोस्रो चरण खेलिरहेको नेपालले तयारीका लागि मैत्रीपूर्ण खेल खेल्न लागेको हो ।

नेपालले साफ च्याम्पियनसिपपछि बंगलादेशसँग खेलेको छैन । २०७५ सालको भदौंमा ढाकामा भएको साफको समूह चरणमा नेपालले बंगलादेशलाई २-० ले हराएको थियो ।