काठमाडौं । राष्ट्रिय खेलकुद परिषद् (राखेप)को बोर्ड बैठक अब तिहारपछि मात्र बस्ने भएको छ ।
युवा तथा खेलकुद मन्त्री जगतबहादुर विश्वकर्माले तयारी नपुगेको भन्दै राखेपको पहिलो बोर्ड बैठक तिहारपछि मात्र बोलाउने तयारी गरेका छन् ।
मन्त्रीपरिषद्ले राखेप बोर्ड सदस्य नियुक्त गरेपछि मन्त्री विश्वकर्माले दशैं लगत्तै बोर्ड बैठक बोलाउने बताएका थिए ।
मन्त्री विश्वकर्मा परिषद्का अध्यक्ष समेत हुन् ।
तर बैठक आयोजनाका लागि तयारी नपुगेको भन्दै मन्त्री विश्वकर्माले तिहारपछि मात्र बैठक बोलाउने बताएका छन् ।
‘बैठक तिहारपछि मात्र होला । तयारीमा जुटिरहेका छौ । बैठक अघि गर्नुपर्ने तयारीका कामहरु धेरै छन् ।’ मन्त्री विश्वकर्माले खेलपाटीसंग भने ।
राष्ट्रिय खेलकुद विकास ऐन २०७७ अनुसार परिषद्को बैठक वर्षको कम्तीमा दुई पटक बस्नुपर्ने उल्लेख छ ।
परिषद्को बैठक अध्यक्षले तोकेको मिति, समय र स्थानमा बस्ने र सदस्य सचिवले अध्यक्षसंगको परामर्शमा बैठकमा छलफल हुने विषयको सूचि सहितको सूचना बैठक भन्दा कम्तीमा सात दिन अगावै सबै बोर्ड सदस्यलाई पठाउनुपर्ने उल्लेख छ ।
बैठकले मुख्य रुपमा परिषद्को वार्षिक योजना, कार्यक्रम तथा बजेट स्वीकृत गर्नेछ ।
मन्त्री विश्वकर्माका अनुसार परिषद्ले पहिलो बैठकका लागि वार्षिक कार्यक्रमहरु बनाउने कामहरु गरिरहेको छ ।
‘पहिलो बैठकका लागि गर्नुपर्ने वार्षिक कार्यक्रम बनाउने काम बाँकी छ । खेलकुद सञ्चालनको आचार संघितादेखि सकिएको खण्डमा नियमावली समेत पुरा गरेर बैठकमा लैजाने तयारी छ ।’ मन्त्री विश्वकर्माले भने ।
राष्ट्रिय खेलकुद विकास ऐन २०७७ असार १७ गते कार्यान्वयनमा आएसंगै परिषद्को तत्कालिन बार्ड भंग भएको थियो ।
नयाँ ऐन अनुसार उपाध्यक्षमा शिव कोईराला, सदस्य सचिवमा रमेशकुमार सिलवाल र बोर्ड सदस्यहरु नियुक्त भएका छन् ।
परिषद्को ३७ जनाको बोर्डमा अझै ओलम्पिक कमिटि, विश्व विद्यालय र उद्योग वाणिज्य महासंघका प्रतिनिधि आउन बाँकी छ ।
मन्त्री विश्वकर्माले यसै हप्ताभित्र बाँकी सदस्यलाई पूर्णता दिने तयारीमा आफु लागेको बताएका छन् ।
यस पटक बस्ने परिषद्को पहिलो बोर्ड बैठकले राखेपको कार्यकारी समितिका लागि चार जना सदस्यको नियुक्ति समेत गर्नेछ ।
बोर्डमा रहेका सदस्यबाट चार जना राखेपको कार्यकारी समितिमा नियुक्त हुनेछन् । नयाँ ऐनले राखेप सञ्चालनका लागि ७ सदस्यीय कार्यकारी समितिको व्यवस्था गरेको छ ।
समितिमा सदस्य सचिवको संयोजकत्वमा युवा तथा खेलकुद मन्त्रालयका खेलकुद महाशाखा प्रमुख र राखेपका विभागीय प्रमुख पदेन सदस्यको रुपमा रहनेछन् । बाँकी चार जनामा दुई जना परिषद् अध्यक्षको हैसियतमा खेलकुद मन्त्री र बाँकी दुई जना परिषद्ले मनोनित गर्ने ऐनमा उल्लेखछ । तर अध्यक्ष र परिषद्ले कार्यकारी समिति नियुक्त गर्दा दुई जनामा कम्तिमा एक महिला अनिवार्य राख्नुपर्नेछ ।
बोर्ड बैठक अघि कार्यकारी समिति गठनमा समेत ठुलो रस्साकस्सी हुने आँकलन गरिएको छ ।
नयाँ ऐन अनुसार खेलकुद सञ्चालन गर्न मन्त्रालय र परिषद्लाई समस्या परेको छ । नियमावली नहुँदा ऐन अनुसार अघि बढ्न दुवै निकायलाई गाह्रो परेको अवस्था छ ।
युवा तथा खेलकुद मन्त्रालयले सह–सचिव भक्तराज ढकालको नेतृत्वमा नियमावली मस्यौदा समिति गठन गरेको छ । तर कोरोनाका कारण नियमावलीको मस्यौदा निर्माणको काम अघि बढ्न सकेको छैन ।
‘ऐन कार्यान्वयनका लागि नियमावली बनाउन आवश्यक छ । नियमावली नहुँदा काम गर्न समस्या हुन्छ । बैठक अघि नियमावलीमै केन्द्रित भईरहेका छौ ।’ मन्त्री विश्वकर्माले भने ।
पछिल्लो पटक आठौं राष्ट्रिय खेलकुदको समापन अघि राखेपको बोर्ड बैठक बसेको थियो । अध्यक्षको अनुपस्थितीमा उपाध्यक्ष पिताम्बर तिम्सिनाले बैठकको अध्यक्षता गरेका थिए । बैठकले नवौं राष्ट्रिय खेलुकद गण्डकी प्रदेशमा आयोजना गर्ने निर्णय गरेको थियो ।
वर्षमा कम्तिमा दुई पटक बस्नुपर्ने बोर्ड बैठक झण्डै दुई वर्षदेखि बस्न सकेको छैन ।
