एम्बाप्पे चम्किदा पीएसजी जित

एजेन्सी । केलियन एम्बाप्पे चम्किएको खेलमा पेरिस सेन्ट जर्मेन (पीएसजी)ले लिग वान फुटबलमा जित निकालेको छ ।

शनिबार राति भएको खेलमा पीएसजीले नान्ट्सलाई ३–० गोल अन्तरले पराजित गरेको हो ।

एम्बाप्पेले एक गोल गर्नुका साथै थप एक गोलको अवसर समेत सिर्जना गरेपछि पीएसजीले सहज जित निकाल्यो ।

आन्द्रे हेरेराले ४७ औं मिनेटमा पीएसजीलाई अघि बढाएका थिए । एम्बाप्पेको पासमा उनले पीएसजीका लागि पहिलो गोल गरेका थिए ।

६५ औं मिनेटमा एम्बाप्पेले पेनाल्टीमा गोल गर्दै पाहुना टोलीको अग्रता दोब्बर बनाउने काम गरे ।

खेल सकिन दुई मिनेट बाँकी छदाँ पाब्लो साराबियाले पीएसजीका लागि तेस्रो गोल गरेका थिए ।

मुख्य फरवार्ड नेयमार चोटका कारण मैदानमा अनुपस्थित थिए । उनले च्याम्पियनस लिगको पछिल्लो खेलमा टर्कीस क्लबविरुद्ध चोट बोकेका थिए ।

पहिलो हाफ गोल रहित बराबरी खेलेपछि दोस्रो हाफमा पीएसजीले तीन गोल निकाल्यो । साविक विजेता पीएसजीले लिग वानमा लगातार ७ खेलमा जित निकाल्न सफल भएको छ ।

शीर्ष स्थानको पीएसजीको ९ खेलबाट २१ ऋंक छ । नान्ट्स ८ अंक सहित १६ औं स्थानमा छ ।