जर्मन क्लबसँग रियलको बराबरीमा

एजेन्सी । च्याम्पियन्स लिग फुटबल अन्तर्गत समूह चरणको दोस्रो खेल स्पेनिस क्लब रियल मड्रिड बराबरीमा रोकिएको छ ।

मंगलबार राति भएको खेलमा रियलले जर्मन क्लब बोरुसिया मुन्छेनग्लाडबाखसँग २-२ गोलको बराबरी खेलेको हो ।

मुन्छेनग्लाडबाखको मैदानमा दुई गोलले पछि परेको रियलले पुनरागमन गर्दै बराबरी खेलेको हो ।

खेलको ३३ औं मिनेटमा मार्कुस थुरामले गोल गर्दै मुन्छेनग्लाडबाखलाई अग्रता दिलाएका थिए ।

खेलको ५८ औं मिनेटमा थुरामले व्यक्तिगत दोस्रो गोल गर्दै मुन्छेनग्लाडबाखलाई २-० को अग्रता दिलाए ।

तर, खेलको ८७ औं मिनेटमा करिम बेन्जिमाले गोल गर्दै रियललाई २-१ स्थितिमा ल्याए ।

त्यसपछि खेलको इन्जुरी समयमा कासिमिरोले गोल गर्दै रियललाई हारबाट जोगाए ।

यो बराबरीसँगै रियलले समूह चरणमा पहिलो अंक जोडेको छ । यस अघि च्याम्पियन्स लिगकै सर्वाधिक सफल टिम रियल युक्रेनी क्लब शाख्तर डोनेक्ट्ससँग ३-२ गोल अन्तरले पराजित भएको थियो ।

समूह 'बी' को रियलले २ खेलमा १ अंक जोडेको छ । रियल समूहको पुछारमा रहेको छ ।

मुन्छेनग्लाडबाख २ खेलमा २ अंक जोडेर तालिकाको दोस्रो स्थानमा रहेको छ ।

यसै समूहको अर्को खेलमा इन्टर मिलानले शाख्तर डोनेक्ट्ससँग गोलरहित बराबरी खेल्दै अंक बाडेको छ ।

इन्टर २ खेलमा २ अंक जोडेर समूहको तेस्रो स्थानमा रहेको छ । शाख्तर २ खेलमा ४ अंक जोडेर शीर्ष स्थानमा रहेको छ ।