रोनाल्डोलाई कोरोनाको प्रोटोकल तोडेको आरोप !

एजेन्सी । इटालियन क्लब युभेन्ट्सका स्टार स्ट्राइकर क्रिस्टियानो रोनाल्डोमाथि कोरोना भाईरसको प्रोटोकल तोडेको आरोप लागेको छ ।

इटालीका खेलकुद मन्त्री भिन्सेन्जो स्पाडाफोराले रोनाल्डोले कोरोनाको प्रोटोकल तोडेको आरोप लगाएका छन् ।

खेलकुद मन्त्री स्पाडाफोराले रोनाल्डोले कोरोना प्रोटोकल तोडेको आरोप लगाउदै अनुसन्धान सुरु गरिएको समेत बताएका छन् ।

'रोनाल्डोले प्रोटोकललाई आदर गरेन । यसलाई प्रमाणित गर्न अभियोजकको कार्यालयले अनुसन्धान गरिरहेको छ,' स्पाडाफोराले भनेका छन् ।

नेसन्स लिग खेल्न पोर्चुगल पुगेका रोनाल्डोलाई अक्टोबर १४ मा कोरोनाको संक्रमण देखिएको थियो । रोनाल्डोको पछिल्लो कोरोना रिपोर्ट समेत पोजेटिभ देखिएको छ ।

पोर्चुगलमै कोरोना पुष्टि भएपछि रोनाल्डो इटाली आएका थिए । इटालीका मात्र १० दिन क्वारेन्टिनमा बस्नु पर्ने भएपछि उनी इटाली फर्किएका थिए ।

रोनाल्डो सरकारको स्वीकृति बिना इटाली आएको आशंका गरिएको छ ।

यस अघि पनि खेलकुद मन्त्रीले रोनाल्डो स्वीकृति बिना इटाली फर्किएको शंका व्यक्त गरेका थिए ।

कोरोना संक्रमित भएपछि रोनाल्डो दुई साता भन्दा बढीबाट मैदान बाहिर रहदै आएका छन् ।

रोनाल्डोले च्याम्पियन्स लिग अन्तर्गत बुधबार हुने बार्सिलोनासँगको खेल समेत गुमाउने छन् ।