'जोटाले अझै राम्रो गर्न सक्छन्'

एजेन्सी । प्रिमियर लिग क्लब लिभरपुलका मुख्य प्रशिक्षक योर्गेन क्लोपले फरवार्ड डिएगो जोटासँग अझै राम्रो खेल्न सक्ने क्षमता भएको बताएका छन् ।

मुख्य प्रशिक्षक क्लोपले जोटाको खेलमा सुधार गर्नु पर्ने कुराहरु रहेको बताउदै उनले अहिलेको भन्दा राम्रो गर्न सक्ने बताएका हुन् ।

पोर्चुगिज फरवार्ड जोटाले शनिबार राति सेफिल्ड युनाईटेडसँगको खेलमा निर्णायक गोल गरेका थिए ।

घरेलु मैदानमा सेफिल्डलाई २-१ ले पराजित गर्दा जोटाले हेड मार्फत ६४ औं मिनेटमा निर्णायक गोल गरेका थिए ।

'हो, डिएगोले एक सुपर गोल गरे र उनी वास्तवमा खेलमा संलग्न थिए । उनी अझ बढी राम्रो गर्न सक्छन् । शतप्रतिशत दिन सक्छन र यो राम्रो समाचार हो,' क्लोपले भनेका छन् ।

२३ वर्षीय जोटा यसै समरमा लिभरपुल आएका हुन् । गत सिजन उल्भ्समा उत्कृष्ट प्रदर्शन गरेपछि लिभरपुलले उनलाई अनुबन्ध गरेको हो ।

जोटा लिभरपुलका लागि यस सिजन ४ लिग खेल खेलेका छन् । र, एनफिल्डमा खेलेका दुबै खेलमा उनले गोल गरेका छन् ।

क्लोपले क्लबको वातारणमा पूर्व रुपमा अभ्यस्त नभएकाले समेत उत्कृष्ट प्रदर्शन गर्न चुकेको बताए ।

'उहाँ अझै रूपान्तरण गर्दै हुनुहुन्छ । यो समय हामीले गर्ने धेरै चीजहरू उसलाई स्वाभाविक हुँदैन । उल्भ्सले फरक खेल्दथ्यो तर उनले उल्भ्सका लागि धेरै गरे जुन हामी उहाँबाट चाहन्छौ,' क्लोपले भने ।

यस्तै क्लोपले जोटा अझै युवा रहेको र उनको भविस्य उज्ज्वल रहेको समेत बताए ।

'हामीले अगाडीनै राम्रो खेलाडी सम्झौता गरेका छौँ । म भन्छु यदी उहाँ फिट हुनुहुन्छ, उनी २३ वर्षका छन् र उनको भविष्य उज्ज्वल छ,' क्लोपले थपे ।

घरेलु मैदानमा सेफिल्डलाई हराएसँगै लिभरपुलले शीर्ष स्थानको एभर्टनसँग अंक बराबरी समेत गरेको छ ।

जितपछि दोस्रो स्थानमा उक्लिएको लिभरपुलले ६ खेलमा १३ अंक जोडेको छ ।