काठमाडौं । अखिल नेपाल फुटबल संघ (एन्फा)को लुम्बिनी प्रदेशको कमिटी गठनमा सहमती जुटाउने प्रयास असफल बनेको छ ।
केन्द्रिय सदस्य दिर्घबहादुर केसी (कुमार)को अगुवाईमा बाँकेको नेपालगञ्जमा बसेको अनौपचारिक भेलाले प्रदेशको नेतृत्व सहित कमिटी गठनमा सहमती जुटाउन सकेन ।
प्रदेशको नेतृत्वमा बाँके जिल्ला फुटबल संघका अध्यक्ष भोजराज शाहीले अडान राखेपछि प्रदेश कमिटी गठनमा सहमती जुट्न नसकेको हो ।
प्रादेशिक संरचना अनुसार एन्फाले गण्डकी प्रदेश, सुदुरपश्चिम, प्रदेश नम्बर एक र प्रदेश नम्बर दुईमा सर्वसम्मत रुपमा प्रादेशिक संगठन गठन गरेको छ ।
लुम्बिनी प्रदेशमा समेत सर्वसम्मत नेतृत्व चयनका लागि केन्द्रिय सदस्य केसीले पहल अघि बढाएका थिए ।
सोही अनुसार बिहिबार केसी अगुवाईको टोली नेपालगञ्ज पुगेको थियो ।
बिहिबार साँझ र शुक्रबार बिहान भएको छलफलमा प्रदेशको नेतृत्वको बिषयमा सहमती जुट्न सकेन ।
प्रदेशको नेतृत्वका लागि बाँके जिल्ला फुटबल संघका अध्यक्ष शाही र दाङका अध्यक्ष पुकार थापा प्रत्यासी छन् ।
केन्द्रिय सदस्य केसीले सहमतीमा नेतृत्व चयनका लागि दुवै पक्षलाई राखेर पहल गरेका थिए । तर दुवै पक्षले अडान छाडेनन् ।
रुपन्देही जिल्ला फुटबल संघका अध्यक्ष समेत रहेका केसीले नेतृत्वमा सहमती जुटाउने प्रयास असफल बनेको बताए ।
‘दुवैलाई संगै राखेर छलफल गराएको हो । तर सहमती जुटेन ।’ केसीले खेलपाटीसंग भने, ‘नेतृत्व गर्नेले सबै जिल्लालाई सहमत बनाउन सक्न पर्छ ।’
केन्द्रिय सदस्य केसीले प्रदेश अन्तर्गतका जिल्लाहरु सहमतीमै अघि बढ्नुपर्ने धारणा राखे ।
उनले प्रदेशले सहमती नजुटेको खण्डमा केन्द्रबाट प्रतिनिधि माग गरेर अधिवेशनको प्रक्रिया अघि बढाउने परिस्थिती बन्ने बताए ।
प्रदेश नम्बर ५ मा एन्फाका ६ सदस्य जिल्ला रहेका छन् । रुपन्देही सहित बर्दिया, बाँके, दाङ, पाल्पा र परासी एन्फाका सदस्य जिल्ला रहेका छन् ।
नेतृत्वमा सहमती जुटेको खण्डमा लुम्बिनी प्रदेश कमिटी गठनको घोषणा गर्ने तयारी थियो ।
प्रदेश अन्तर्गतका जिल्लाबीच सहमती नबन्दा केन्द्रले निर्णय गरेर अधिवेशन प्रक्रिया अघि बढाउनेछ ।
छलफलमा बाँके अध्यक्ष शाहीले प्रदेशको नेतृत्वमा अडान राखेका थिए ।
उनले आफ्नो तर्फबाट कुनै कमजोरी भए सच्चिएर अघि बढ्ने प्रतिबद्धता जनाएका थिए । उनले जिम्मेवारी दिएर आफुलाई अघि बढाउन आग्रह गर्दै कमजोरी देखिएको खण्डमा कारबाही भोग्न तयार रहेको बताएका थिए ।
‘काम गर्ने शिलशिलामा केही कमी–कमजोरी भए सुधार गर्छु । विश्वास गरेर नेतृत्वले जिम्मेवारी दिने वातावरण बनाउनुपर्छ । कमजोरी देखिएको खण्डमा कारबाही भोग्न तयार हुनेछु ।’ शाहीको भनाई उद्धित गर्दै एक सदस्यले भने ।
खेलपाटीसंग कुरा गर्दै शाहीले पहिल्यै निर्णय गरेर सल्लाह गर्न आएका कारण सहमती जुट्न नसकेको खेलपाटीलाई बताए ।
‘समझदारीका साथ सल्लाह गरेको भए राम्रो सन्देश जान्थ्यो । तर घेराबन्दी गरेर राम्रो व्यहार भएन ।’ उनले भने ।
फुटबल संघको विधानको प्रादेशिक संरचना अनुसार एन्फाले लुम्बिनी, कर्णाली र बाग्मतीमा मात्र कमिटी गठन गर्न बाँकी छ । अन्य सबै प्रदेशमा सर्वसम्मत रुपमा प्रादेशिक संरचना तयार भएका छन् ।
एन्फा प्रवक्ता किरण राईले सहमती नबनेको खण्डमा विधान अनुसार प्रदेशको कमिटी गठनको अधिकार केन्द्रलाई भएको बताए ।
‘सहमतीमा तलबाट समेत कमिटी बन्न सक्छ । तर कानुन अनुसार केन्द्रले प्रदेशको कमिटी बनाउने हो । केन्द्रसंग त्यो अधिकार छ ।’ उनले भने ।
