काठमाडौं । ए डिभिजन क्लब मनाङ मर्स्याङ्दी क्लबले प्रशिक्षक तापे फुजा सहितका विदेशी खेलाडीलाई घर फर्काएको छ ।
फुजा सहित ४ विदेशी खेलाडीलाई मनाङले स्वदेश फर्काएको हो ।
‘खेलाडीलाई यस अघिनै फर्काइसकेका थियौं । प्रशिक्षक पनि फर्कनु भएको छ ।’ मनाङका महासचिव अनिल गुरुङले खेलपाटीसंग भने ।
गत हप्तामात्रै मनाङले आफिज ओलावाले, फेमी जोसुवा र एडेलाजा सोमिडेलाई स्वदेश फर्काएको हो । तीनै जना विदेशी खेलाडीले गत सिजन मनाङबाट लिग खेलेका थिएनन् ।
घरेलु फुटबलका चर्चित फरवार्ड अफिज लिग सकिए लगत्तै मोफसलका प्रतियोगिता खेल्न नेपाल आएका थिए । फेमी थ्री स्टारबाट मोफसल खेल्न मनाङ पुगेका थिए।
एडेलाजा भने नयाँ सिजन मनाङमा खेल्नेछन् । उनले गत सिजन मछिन्द्रबाट खेलेका थिए ।
गत सिजन मछिन्द्रलाई लिग जिताउन महत्वपूर्ण भुमिका निर्वाह गरेको एडेलाजा त्यसअघि मनाङबाट समेत लिग जित्न सफल भएका थिए ।
मनाङले प्रशिक्षक फुजा सहित आफिज र एडेलाजालाई एड्भान्स सहित स्वदेश फर्काएको हो । मनाङले प्रशिक्षक फुजा सहित तीन जनालाई नयाँ सिजन क्लबमै राख्ने निर्णय गरिसकेको छ ।
नयाँ सिजन खेलाउने निर्णय सहित एड्भान्स दिएर प्रशिक्षक र खेलाडीलाई घर फर्काएको महासचिव गुरुङले जानकारी दिए ।
‘उनीहरु अर्काे सिजन समेत मनाङबाटनै खेल्ने भएका छन् । त्यसैले एड्भान्स सहित फर्काएका हौं ।’ उनले भने ।
घरेलु फुटबल निश्चित भएपछि मात्रै उनीहरु नेपाल फर्कने गुरुङ बताउँछन् ।
‘नेपालमा जब फुटबल सुरु हुन्छ । त्यसपछि मात्रै फर्कनु भनेका छौं । लिग हुने निश्चित भएपछि बोलाउँछौं ।’ गुरुङले भने ।
कोरोना महामारीका बीच खेलकुद क्षेत्र ठप्प भएपनि विदेशी खेलाडी नेपालमा रहँदै आएका थिए । तर पछिल्लो समय भिषाको समय समाप्त हुनु र फुटबल खेलको टुंगो नहुँदा विदेशी खेलाडी स्वदेश फर्कन थालेका हुन् ।
यसअघि, साविक विजेता मछिन्द्र, थ्री–स्टार लगायतका क्लबले समेत आफ्ना विदेशी खेलाडी फर्काएका थिए ।
घर फर्किएका खेलाडी र प्रशिक्षकलाई मनाङले राहत स्वरुप ७ सय डलर समेत सहयोग गरेको महासविच गुरुङले बताए ।
यसअघिनै मनाङले राष्ट्रिय टिमका डिफेन्डर दिनेश राजबंशी, फ्रेण्डस् क्लबका कप्तान सरोज योञ्जन सहित विश्व अधिकारीलाई नयाँ सिजनका लागि टिममा अनुबन्धन गरिसकेको छ ।
गत सिजन लिगमा खराब प्रदर्शन गरेको मनाङले तेस्रो स्थानमा चित्त बुझाएको थियो । सोही कारण उसले नयाँ सिजनका लागि ठुला खेलाडी टिममा अनुबन्धन गर्न प्रयास गरिरहेको छ ।
-1751767608.webp)
