एजेन्सी । मैत्रीपूर्ण फुटबलमा जर्मनी र टर्कीले ३–३ गोलको बराबरी खेलेका छन् ।
दोस्रो हाफको इन्जुरी समयमा गोल गर्दै टर्कीले घरेलु टोली जर्मनीलाई बराबरीमा रोकेको हो ।
खेलमा तीन पटक पछि परेको अवस्थालाई उल्ट्याउँदै टर्कीले बराबरीको नतिजा निकाल्यो । पाहुना टोलीका लागि ओजान तुफान, एफेकेन कराका र केनन करमनले गोल गरेका थिए ।
जर्मनीलाई सुरुवाती दुई पटक अग्रता भने जुलियन ड्रेक्सलर र डेब्यु खेलाडी फ्लोरियन न्यूरोहासले दिलाएका थिए । दुवै गोलका लागि चेल्सीका नयाँ स्टार काइ हभार्ट्जले पास उपलब्ध गराएका थिए ।
जर्मनीलाई तेस्रो पटक खेलमा अग्रता भने जुयान लुका वाल्डस्मिटले दिलाएका थिए ।
घरेलु टोली जर्मनीले थुप्रै अवसरलाई गोलमा परिणत गर्न सकेन । टर्कीविरुद्धको खेल नियन्त्रणमा राखेपनि जर्मनीले जित निकाल्न भने सकेन ।
जर्मनीका प्रशिक्षक जोचिम लेउले बायर्नका खेलाडी म्यानुएल नुयर र सर्ज ग्याब्रीलाई आगामी नेसन्स लिगका लागि आराम दिएका थिए ।
सन् २०१४ को विश्वकप विजेता जर्मनी शनिबार युक्रेनको भ्रमणमा निस्कदैछ । उनले मंगलबार भने स्विटजरल्याण्डलाई घरेलु मैदानमा आतिथ्यता प्रदान गर्नेछ ।
-1753777217.png)
