आर्सनलमा एट्लेटिको मड्रिडका मिडफिल्डर

एजेन्सी । आर्सनलले ला लिगा क्लब एट्लेटिको मड्रिडका मिडफिल्डर थोमस पार्टेलाई अनुबन्धन गरेको छ ।

लण्डन क्लबले ५० मिलियन युरोमा एट्लेटिको मड्रिडका मिडफिल्डरलाई अनुबन्धन गरेको हो ।

२७ वर्षिया घानाका मिडफिल्डरले पछिल्लो सिजन ३५ खेल खेल्दै ३ गोल गरेका थिए । डिएगो सिमोन नेतृत्वको एट्लेटिकोले तेस्रो स्थानमा रहदै लिगको अन्त्य गरेको थियो ।

उनी सन् २०११ म एट्लेटिकोमा आबद्ध भएका थिए । उनले ला लिगा क्लबबाट १ सय ८८ खेलमा प्रतिनिधित्व गरे ।

आर्सनलले समर ट्रान्सफरमा घानाका मिडफिल्डरलाई अनुबन्धनका लागि कोशिश गरिरहेको थियो । पार्टेले घानाबाट २९ अन्तराष्ट्रिय म्याच खेलेका छन् ।

उनले एट्लेटिकोबाट सन् २०१७–१८ मा युरोपा लिग र सन् २०१८ मा सुपर कप जितेका थिए ।

उनले सन् २०१८ मा एट्लेटिकोसंग सम्झौता नविकरण गर्दै सन् २०२३ सम्म बस्ने निर्णय गरेका थिए ।

आर्सनलले प्रिमियर लिगका सुरुवाती ३ मध्य २ खेलमा जित निकालेको छ । गत सिजन आर्सनलले आठौं स्थानमा रहदै लिगको अन्त्य गरेको थियो ।