फुटसल खोल्ने व्यवसायीको निर्णय

काठमाडौं । फुटसल व्यवसायीहरुको छाता संघठन नेपाल फुटसल संघले ६ महिनादेखि बन्द रहेको फुटसल खोल्ने निर्णय गरेको छ ।

मंगलबार विज्ञप्ती निकाल्दै फुटसल संघले लामाे समयदेखि रोकिएको फुटसल सुरु गर्ने जानकारी दिएको छ ।

‘हामी व्यवसायी बाध्य भएर बुधबारका दिन सावधानी अपनाएर देशभर खेल सञ्चालन गराउन बाध्य भएका छौं ।’ विज्ञप्तीमा भनिएको छ ।

चैत ११ गतेबाट सुरु भएको लकडाउन र असोज ४ गतेको निषेधाज्ञा पुरा भएर जनजीवन सामान्य अवस्थामा पुग्दा समेत सरकार फुटसलप्रति उदासिन नभएको संघले ठहर गरेकाे छ । 

नेपाल सरकारले होटल, रेष्टुरेन्ट, सार्वजनिक यातायात लगायत भिड–भाड हुने क्षेत्रलाई खोल्ने निर्णय गरेपनि समुहमा खेलिने खेल र गतिविधि गर्न प्रतिबन्ध लगाएको छ ।

यस्तै, संघले जिल्ला प्रशासन कार्यालयमा सावधानी अपनाएर खेल संञ्चालनको अनुमती मागेपनि सरकार उदासिन देखिएको निष्कर्श सहित सरकारी निर्णय बेगरनै फुटसल खोल्ने निर्णय गर्नु परेको जनाएको छ ।

निजी क्षेत्रबाट लगानी गरी नागरिकको मानसिक, शारीरिक, स्वास्थ्य र मनोरन्जन कायम गराउने अभिप्रायले अबौं रकम खर्च गरि सञ्चालनमा रहेका देशभरिका फुटसल बन्द हुदा व्यवसायीहरु चरम आर्थिक मारमा परेको संघले जनाएको छ ।

सरकारले यस क्षेत्रमा ध्यान नदिदा जग्गाको भाडा, बैंकको ब्याज, कर्मचारीको पारिश्रमिक दिन समेत नसकेको अवस्थामा सावधानी अपनाएर देशभरका फुटसल बुधबारबाट खोल्ने निर्णय संघको छ ।

संघले डब्लुएचओको मापदण्ड अनुसार अन्य व्यवासयीक क्षेत्र भन्दा धेरै सुरक्षित तरिकाले फुटसल सञ्चालन गर्न सकिने बताएको छ ।