एजेन्सी । बार्सिलोनाले डच फरवार्ड मेम्फिस डिपेलाई अनुबन्धनको तयारी गरेको छ ।
म्यान्चेष्टर युनाईटेडका पूर्व खेलाडी डिपेलाई बार्सिलोनाले नयाँ फरवार्डको रुपमा अनुबन्धनको तयारी गरेको हो ।
डच खेलाडी डिपेलाई स्पेनिस महारथी क्लबमा लुईस सुआरेजको विकल्पको रुपमा हेरिएको छ ।
बार्सिलोनाको कमाण्ड सम्हाल्न आईपुगेका प्रशिक्षक रोनाल्ड कोम्यान टिम पुनर्निमाणमा जुटेका छन् । बायर्न म्युनिखसंग ८–२ ले पराजित बनेपछि बार्सिलोनाले कोम्यानलाई नयाँ प्रशिक्षकको रुपमा नाउ क्याम्पको जिम्मेवारी दिएको छ ।
सुआरेजलाई बार्सिलोनामा एक्लै प्रशिक्षण गर्ने अवस्था सिर्जना गरिएको छ । उनलाई यस समर ट्रान्सफरमा क्लब बाहिर पठाउन चाहन्छ ।
उरुग्वेका फरवार्ड ब्यक्तिगत रुपमा सिरि ए च्याम्पियन युभेन्ट्स जाने बिषयमा सहमत बनेका छन् ।
कोम्यान जति सक्दो चाँडो डच खेलाडी डिपेलाई क्याम्प नाउमा उतार्न चाहन्छन् ।
नेदरल्याण्डका फरवार्ड गत सिजन निकै राम्रो फर्ममा देखिएका थिए । उनले लिग वानका २६ खेलमा १५ गोल गरेका थिए ।
लिग वानको उद्घाटन खेलमा उनले गत हप्ता मात्र ह्याट्रिक गरेका थिए ।
प्रिमियर लिग क्लब म्यान्चेष्टर युनाईटेडमा दुई बर्ष बिताएका डिपे क्लबमा प्रभाव छाड्न असफल रहेका थिए ।
बार्सिलोनालाई तत्काल सुआरेजको विकल्पको रुपमा नयाँ फरवार्ड चाहिएको छ । सोही अनुसार क्लबले डिपेलाई १७ मिलियन पाउण्डमा अनुबन्धन गर्ने सकिने विश्वास गरेको छ । उनको क्लबसंग अझै १ बर्षको सम्झौता बाँकी रहेको छ ।
सुआरेज यसै महिना बार्सिलोनामा ६ बर्षको बसाईलाई बिट मार्दैछन् । उनी सन् २०१४ मा क्याटलान क्लबमा ७५ मिलियन पाउण्डमा अनुबन्धन भएका थिए ।
सुआरेज बार्सिलोनाका कप्तान लियोनल मेस्सीका राम्रा मित्र हुन् । क्लबका अध्यक्ष जोसेप मारिया बर्टोमेउले सुआरेजलाई क्लब बाहिर पठाउन खोजेपछि मेस्सी समेत असन्तुष्ट थिए ।
तर अर्जेन्टिनी फरवार्ड थप एक सिजन बार्सिलोनामै बस्ने निश्चित भएको छ । मेस्सी बार्सिलोनामा बस्ने भएपछि नयाँ प्रशिक्षक कोम्यानलाई केही राहत मिलेको छ ।
डिफेन्डर जेरार्ड पिके र सर्जियो बुस्केटको समेत बार्सिलोनाको करियर सकिन लागेको आँँकलन गरिएको छ ।
नयाँ प्रशिक्षक कोम्यानले डिपेलाई बार्सिलोनाका फरवार्ड एन्टोनी ग्रिजम्यानको साझेदारको रुपमा मैदानमा उतार्न चाहेको देखिन्छ ।
