अवसरलाई प्रमाणित गर्छु – अभिषेक

काठमाडौं । भारतीय दोस्रो डिभिजन क्लबसँग आबद्ध भएका अभिषेक रिजालले राम्रो प्रदर्शन गर्दै क्लबलाई शीर्ष डिभिजनमा पुर्याउन सहयोग गर्ने बताएका छन् ।

राष्ट्रिय फुटबल टिमका युवा स्ट्राइकर भारतको दोस्रो डिभिजन क्लब मोहम्मेदन स्पोर्टिङसँग तीन बर्षका लागि आबद्ध भएका हुन् ।

सम्झौतापछि खेलपाटीसँग बोल्दै अभिषेकले भने, ‘यो एउटा अवसर हो । भारतमा राम्रो प्रदर्शन गर्दै क्लबलाई आईलिगमा बढुवा गराउन सहयोग गर्छु ।’

मोहम्मेदन एससी क्लब भारतको पुरानो मध्य एक क्लब हो । क्लब सन् १८९१ मा स्थापना भएको हो । स्थापनाकालदेखि क्लब शीर्ष डिभिजनमा उक्लिन सकेको छैन । तर क्लबले यस सिजन भने शीर्ष डिभिजनमा उक्लिने योजना सहित तयारी गरेको छ । सोहि अनुरुप उसले विदेशी खेलाडी झिकाउने काम पनि गरेको छ ।

घरेलु फुटबलका युवा स्टार अभिषेकलाई उसले एसियन कोटामा अनुबन्धन गरेको हो ।

अभिषेक र क्लबबीच तीन बर्षको सम्झौता छ । तर क्लब शीर्ष डिभिजनमा उक्लन असफल बनेको अवस्थामा अभिषेक प्रस्ताव आएको खण्डमा अन्य क्लबमा जान पाउनेछन् ।

अभिषेक लामो समयका लागि देश बाहिरका क्लबसंग सम्झौता गरेका छन् । यसअघि पुर्व कप्तान अनिल गुरुङले भारतकै सिलोङ लाजोङसँग तीन बर्षको सम्झौता गरेका थिए । तर उनले बीचमै क्लबसँग सम्झौता रद्ध गरेका थिए ।

हाल भारतको दोस्रो डिभिजन लिग खेलिरहेको मोहम्मेदन एफसी ६ खेल खेल्दै लिग तालिकाको शीर्ष स्थानमा रहेको छ । उसले ४ खेलमा जित निकाल्दै २ खेलमा हार ब्यहोरेको छ । कोरोना महामारीकाबीच रोकिएको लिग यसै महिनाबाट सुरु गर्ने तयारी छ ।

हाल भारतमा २७ लाख भन्दा बढिमा कोरोना संक्रमण देखिएको छ । यस्तै ५२ हजार भन्दा बढिको मृत्यु भएको छ । तर भारतीय फुटबल महासंघले भने बन्द रंगशालामा लिग आयोजना गर्ने बताएको छ ।

क्लबसँग सम्झौता भएसँगै अभिषेक बुधबारनै वेष्ट बंगालतर्फ प्रस्थान गरिसकेका छन् । बिहिबार बिहान काँकडभित्ता पुगेका उनी बोर्डर हुँदै कोलकत्ता पुग्नेछन् ।

भारतमा घरेलु उडान सुचारु भैसकेका कारण अभिषेक बोर्डरबाट ह्वाई मार्ग हुँदै कोलकत्ता पुग्नेछन् ।

गतबर्ष मलेसियाविरुद्ध खेल्दै राष्ट्रिय टिममा डेब्यु गरेका अभिषेकले एक गोल समेत गरेका थिए । उनले चाईनिज ताईपेबिरुद्ध गोल गरेका हुन् ।

घरेलु लिगमा भने उनले नेपाल पुलिसबाट खेल्दै डेब्यु गरेका थिए । उनले मछिन्द्र क्लबबाट लिगको उपाधिनै हात पारे । अभिषेकले मनाङ मर्स्याङ्दीकाे  प्रतिनिधित्व गर्दै एएफसी कपमा सहभागी भएका थिए ।

भारतीय आईलिग च्याम्पियन मिनेर्वा पञ्जावबिरुद्ध गोल गरेसँगै उनलाई भारतीय क्लबले चासो राखेका थिए ।