‘एम्बाप्पेको फिटनेसनै पीएसजीलाई पर्याप्त’
एजेन्सी । पेरिस सेन्ट जर्मेन (पीएसजी)का प्रशिक्षक थोमस टुचेलले फरवार्ड केलियन एम्बाप्पेको फिटनेसनै च्याम्पियन्स लिगको सेमिफाईनलमा उत्रन पर्याप्त हुने बताएका छन् ।
उनले एम्बाप्पे फिटनेस सेमिफाईनलमा आरबी आईपेजिगबिरुद्ध खेल्न आफुहरुलाई पर्याप्त हुने बताएका हुन् ।
मंगलबार राति पीएसजीले च्याम्पियन्स लिगको सेमिफाईनल खेलमा जर्मन क्लब आरबी लाईपेजिगसंग प्रतिस्पर्धा गर्दैछ ।
पैतालामा चोट बोकेका फ्रान्सका अन्तराष्ट्रिय फरवार्ड च्याम्पियन्स लिगको क्वार्टरफाईनलमा एटलान्टाबिरुद्ध दोस्रो हाफमा मैदान छिरेका थिए । एम्बाप्पे प्रेरित पीएसजीले खेलको अन्तिम समयमा २–१ को पुनरागमन जित निकालेको थियो ।
पीएसजीका प्रशिक्षक टुचेलले २१ बर्षिया फरवार्डलाई सुरुवाती प्लेईङ सेटमा मैदान उत्रने निश्चित गरेका छैनन् । तर लाईपेजिगबिरुद्ध कुनैपनि रुपमा एम्बाप्पे मैदान उत्रने टुचेलले अपेक्षा गरेका छन् ।
‘उनले एटलान्टाबिरुद्ध ३० मिनेट खेलेका थिए । उनले आफ्नो क्षमतामा वृद्धि गरेका छन् ।’ टुचेलले भनेका छन् ।
‘उनले सुरु गर्न सक्नेछन् । तर उनले ९० मिनेट खेल्ने कुरा हेर्न बाँकी छ । प्रशिक्षणपछि उनले सुरुवात गर्ने÷नगर्ने बिषय तय हुनेछ ।’ टुचेलले थपे ।
एम्बाप्पेले पीएसजीलाई सेमिफाईनल पुर्याउन मुख्य भूमिका खेलेका थिए । उनले चौपो मोटिङका लागि विजयी गोल गर्न पास उपलब्ध गराएका थिए । त्यसअघि नेयमारको पासमा मार्कुन्होसले बराबरी गोल फर्काएका थिए ।
सेमिफाईनलको खेलमा दुवै फरवार्ड उपलब्ध हुदाँ टुचेललाई राहत मिलेको छ ।
‘त्यो नै हाम्रो बलियो पक्ष हो ।’ उनले नेयमार र एम्बाप्पेको बारे भने, ‘उनीहरुले जहिल्यै फरक गर्छन् । नेयमारको ड्रिब्लिङ र केलियन एम्बाप्पेको गतिको मिश्रण सधै राम्रो हुन्छ । जो सधै गोल गर्न भोको रहन्छन् ।’
‘नेयमार नेतृत्वको हिसाबले अलि फरक छन् । उनीसंग क्षमता छ । उनी मैदानमा निकै आत्मविश्वासी देखिन्छन् ।’ टुचेलले भने ।
‘उनी सधै जित्न चाहन्छन् । सधै भिड्न चाहन्छन् । उनी प्रतिस्पर्धा गर्न मन पराउँछन् । त्यो नै नेतृत्व गर्नेलाई आवश्यक पर्छ ।’ उनले भने ।
