युनाइटेडका विंगर चोङ्ग ब्रेमेनमा
एजेन्सी । जर्मन क्लब भेरडाआ ब्रेमेनले डच विंगर ताहिथ चोङ्गलाई लोनमा अनुबन्ध गरेको छ ।
ब्रेमेनले युवा विंगर चोङ्गलाई म्यानचेस्टर युनाइटेडबाट एक सिजनको लागि लोनमा अनुबन्ध गरेको हो ।
२० वर्षे विंगरसँग ब्रेमेनले आइतबार सम्झौता पत्रमा हस्ताक्षर गरेको छ ।
'पहिलो टिमको अनुभव प्राप्त गरिसकेका चोङ्ग ब्रेमेनमा अनुबन्धित भएका छन्,' क्लबले जारी गरेको विज्ञप्तिमा भनिएको छ ।
नेदरल्यान्ड्सको यू-२१ टोलीका सदस्य चोङ्ग सन् २०१६ मा युनाइटेडको एकेडेमीमा अनुबन्धित भएका थिए ।
उनले सन् २०१८ मा युनाइटेडको सिनियर टिममा डेब्यु गरेका थिए ।
युनाइटेडसँग चोङ्गको सम्झौता सन् २०२२ को जुनसम्म रहेको छ । उनले युनाइटेडका लागि हालै युरोपा लिग अन्तर्गत अन्तिम १६ को खेल खेलेका थिए ।
ब्रेमेन बुन्डेसलिगाको नयाँ सिजनको लागि प्रि-सिजन तयारी गरिरहेको छ । नयाँ सिजन सेप्टेम्बर १८ बाट सुरु हुनेछ ।
