टी-ट्वान्टी विश्वकप भारतमै, महिला विश्वकप सर्यो

एजेन्सी । भारतमा तय भएको सन् २०२१ को आईसीसी टी-ट्वान्टी विश्वकप क्रिकेट नसर्ने भएको छ ।

अन्तर्राष्ट्रिय क्रिकेट परिषद (आईसीसी) ले शुक्रबार २०२१ को विश्वकप तोकिएकै मितिमा आयोजना हुने जनाएको छ ।     

कोरोना भाईरसको महामारीको कारण प्रतियोगिता सर्ने आँकलन गरिएको थियो ।

तर, आईसीसीले भारतलाई आगामी वर्ष तय भएको विश्वकप तोकिएकै मितिमा आयोजनाको अधिकार दिएको हो ।

आईसीसीबाट अनुमति पाएसँगै भारतमा हुने विश्वकप सन् २०२१ को अक्टोबर देखि नोभेम्बरसम्म हुनेछ । फाइनल नोभेम्बर १४ मा हुने बताईएको छ ।

आईसीसीले अष्ट्रेलियामा यस वर्ष तय भएको टी-ट्वान्टी विश्वकप भने २०२२ मा गर्ने निर्णय गरेको छ ।

कोरोना भाईरसको महामारीको कारण आईसीसीले २०२० को विश्वकप २०२२ सम्मको लागि स्थगित गरेको हो ।

त्यस्तै न्युजिल्यान्डमा आगामी वर्ष आयोजना गर्ने भनिएको महिलाको एकदिवसीय विश्वकप क्रिकेट भने एक वर्ष सारिएको छ । अब महिलाको विश्वकप २०२२ मा हुनेछ ।

यस अघि महिला विश्वकप सन् २०२१ को फेब्रुवरी ६ देखि मार्च ७ सम्म आयोजना हुने बताईएको थियो ।