आरसीबीबाट आईपीएल खेल्न फिन्च आतुर

एजेन्सी । अष्ट्रेलियाका कप्तान आरोन फिन्चले नयाँ टिमबाट इन्डियन प्रिमियर लिग (आईपीएल) खेल्न आफु आतुर भएको बताएका छन् ।

भारतीय न्युज एजेन्सी एएनआईसँग कुरा गर्दै फिन्चले रोयल च्यालेज्नर्स बैंगलोर (आरसीबी) बाट आईपीएल खेल्न आफु आतुर भएको बताएका हुन् ।

'आरसीबीमा सामेल हुनका लागि पर्खन सकिरहेको छैन । केहि महान खेलाडीहरु रहेको फेन्चाईज टिमबाट खेल्ने अवसर प्राप्त गर्दा रमाइलो हुनेछ,' फिन्चले भनेका छन् ।

विराट कोहलीको कप्तानीमा रहेको आरसीबीले ३३ वर्षीय फिन्चलाई यस वर्ष अक्सनबाट अनुबन्ध गरेको थियो ।

यस अघि फिन्चले किंग्स इलाभेन पन्जाबबाट आईपीएल खेल्दै आएका थिए ।

यस्तै फिन्चले कोहलीको कप्तानीमा खेल्नका लागि आफु उत्साहित भएको समेत बताए ।

'विराटको नेतृत्वमा पहिलो पटक खेल्न लागेको छु । त्यसैले म धेरै उत्साहित छु । धेरै वर्षबाट उनीविरुद्ध अन्तर्राष्ट्रिय क्रिकेट र आईपीएलमा खेल्दै आएको छु उनी कति प्रतिस्पर्धी छन् मलाई थाहा छ,' फिन्चले भनेका छन् ।

फिन्चले आफुले आईपीएलमा टिमको जितका लागि सक्दो राम्रो खेल्ने समेत बताए ।

कोरोनाको महामारीको कारण यस वर्षको आईपीएल युएईमा आयोजना हुनेछ । आईपीएल सेप्टेम्बर १९ देखि नोभेम्बर १० सम्म हुने तालिका रहेको छ ।