विकास राष्ट्रिय फुटबल टिमको 'गोलकिपर प्रशिक्षक'

काठमाडौं । अखिल नेपाल फुटबल संघ (एन्फा) ले विकास मल्ललाई राष्ट्रिय फुटबल टिमको गोलकिपर प्रशिक्षक नियुक्त गरेको छ ।

एन्फाको टेक्निकल कमिटीले मंगलबार राष्ट्रिय टोलीका पूर्व गोलकिपर विकासलाई राष्ट्रिय टिमको गोलकिपर प्रशिक्षक नियुक्त गरेको हो ।

एन्फाले जापानी प्रशिक्षक हिरो मिट्सुमरुको स्थानमा विकासलाई नियुक्त गरेको हो ।

जापानी प्रशिक्षक स्वयंसेवकको रूपमा नेपाली टोलीका गोलकिपर प्रशिक्षक रहेका थिए । तर, उनी कोरोना भाईरसको महामारीको कारण जापानमै रहेका छन् । 

त्रिभुवन आर्मी क्लबका पूर्व गोलकिपर विकास आफ्नो समयको उत्कृष्ट गोलकिपर हुन् । नेपाली सेनाका मेजर समेत रहेका विकासले २००५ देखि १३ सम्म नेपालका लागि खेलेका थिए ।

नेपालका चर्चित गोलकिपर उपेन्द्रमान सिंहलाई प्रतिस्थापन गरेका विकासले २००५ मा बंगलादेशमा भएको साफ च्याम्पियनसिपबाट डेब्यु गरेका थिए ।

आर्मी क्लबका पूर्व कप्तान समेत रहेका विकासले एएफसी लेभल-१ गोलकिपर कोचिङ कोर्स, एएफसी 'सी' कोचिङ लाइसेन्स र फिफा एमए सर्टिफिकेट प्राप्त गरिसकेका छन् ।

एन्फाको नियुक्तिसँगै विकास फिफा विश्वकप छनोट र एसियन कप छनोट खेलिरहेको नेपाली टोलिसँग सामेल हुने छन् । 

नेपाली टोलीले यसै साताबाट प्रशिक्षण थाल्दैछ ।

कतारमा हुने विश्वकपको छनोटमा अब नेपालले तीन होम खेल खेल्न बाँकी रहेको छ ।

समूह बी को नेपालले अवे खेल खेलिसकेको छ ।

अब नेपालले अष्ट्रेलिया, जोर्डन र चाईनिज ताईपेसँग खेल्न बाँकी रहेको छ । नेपालले अक्टोबर ८ मा चाइनिज ताइपे, अक्टोबर १३ मा अष्ट्रेलिया र नोभेम्बर १२ मा जोर्डनसँग खेल्नेछ ।