युरोपियन फुटबलका उत्कृष्ट ५ विंगर !
एजेन्सी । कोरोना भाईरसको महामारीको कारण करिब तीन महिना अवरुद्ध युरोपियन क्लब फुटबलको सिजन लगभग समाप्त भईसकेको छ ।
युरोपकै सर्वाधिक ठुला र चर्चित लिग इंग्लिस प्रिमियर लिग,स्पेनिस ला लिगा, जर्मन बुन्डेस लिगा समाप्त भईसकेको छ ।
इटालियन सिरी 'ए' को अन्तिम चरणको केहि खेल बाँकी रहेको छ । फ्रेन्च लिग भने कोरोनाको महामारीपछि रद्द भईसकेको छ ।
कोरोनाले प्रभावित यस सिजनको अन्त्यसँगै खेलाडीहरुले गरेको प्रदर्शनको मूल्यांकन सुरु भएको छ ।
युरोपियन क्लब फुटबलमा यस सिजन खेलाडीले कस्तो प्रदर्शन गरे ? कुन पोजिसनमा कुन खेलाडी जमे ? यसको तथ्यांक निकाल्न सुरु भएको छ ।
यस सिजन उत्कृष्ट प्रदर्शन गर्ने युरोपका ५ विंगरको चर्चा तल गरिएको छ ।
१. रहिम स्ट्रर्लिङ
प्रिमियर लिग क्लब म्यानचेस्टर सिटीले यस सिजन लिगको उपाधि रक्षा गर्न सकेन । सिटीले यस सिजन उपाधि लिभरपुललाई सुम्पियो ।
तर, सिटीका विंगर रहिम स्ट्रर्लिङको प्रदर्शन भने उच्च रह्यो । उनको उच्च प्रदर्शनसँगै सिटी यस सिजन दोस्रो स्थानमा रह्यो ।
इंग्ल्यान्डका विंगर स्ट्रर्लिङले यस सिजन लिगमा २० गोल पुरा गरे । स्ट्रर्लिङ गोल्डेन बुटको दाबेदारको शीर्ष चारमा रहे ।
२५ वर्षीय विंगरले यस सिजन सिटीका लागि सबै खाले प्रतियोगितामा भने ३० गोल कटाए । जुन उनको करियरको उत्कृष्ट सिजन हो ।
त्यसैले यस सिजन उत्कृष्ट विंगरको सूचीमा स्ट्रर्लिङ शीर्ष स्थानमा रहेका छन् ।
२. जाडोन सान्चो
जर्मन क्लब बोरुसिया डर्टमण्डका विंगर सान्चो यस सिजनको उत्कृष्ट विंगर मध्येका एक हुन् । डर्टमण्डका लागि उत्कृष्ट खेलेका सान्चोले यस सिजन १७ गोल र १६ गोलका लागि पास उपलब्ध गराउन सफल भएका थिए ।
२० वर्षीय युवा विंगर सान्चो युरोपियन फुटबलकै आक्रमक खेलाडी हुन् । यस सिजन गरेको उच्च प्रदर्शनकै कारण उनलाई अनुबन्ध गर्न थुप्रै क्लब लागि परेका छन् ।
इंग्ल्यान्डका सान्चो गोल गर्न, पास उपलब्ध गराउन माहिर मानिन्छन् । स्किल र पेसको कारण पनि सान्चो चर्चित छन् ।
यस सिजन बुन्डेसलिगामा डर्टमण्ड दोस्रो स्थानमा रह्यो । तर, सान्चोको प्रदर्शन भने सम्झन लायक रह्यो । उनी यस सिजनको गोल्डेन ब्वाई अवार्डको हकदार हुन् ।
३. साडियो माने
लिभरपुलका विंग मानेर यस सिजनको उत्कृष्ट विंगर हुन् । किनकि लिभरपुललाई प्रिमियर लिगको उपाधि दिलाउन उनको भूमिका महत्वपूर्ण रह्यो ।
लिभरपुलले करिब ३० वर्षपछि प्रिमियर लिगको उपाधि उचाल्यो । जसमा मानेको प्रदर्शन सम्झनलायक रह्यो ।
सेनेगलका मानेले यस सिजन लिगमा १८ गोल समेत गरे । लिभरपुलमा माने यस सिजन मोहमद सलाहको मुख्य साझेदारको रुपमा रहे ।
प्रशिक्षक योर्गेन क्लोपको आगमनपछि माने लिभरपुलका लागि मुख्य विंगरको रुपमा रहदै आएका छन् । उनी बल पकड राख्न, गोल गर्न र चलाखीपूर्ण पास उपलब्ध गराउन माहिर मानिन्छन् ।
४. मोहमद सलाह
लिभरपुललाई ३० वर्षपछि प्रिमियर लिगको उपाधि दिलाउन सलाहको प्रदर्शन उच्च रह्यो । त्यसैले पनि उनी यस सिजन युरोपियन फुटबलका उत्कृष्ट विंगर मध्येका एक हुन् ।
एनफिल्डको मुख्य अट्याकरको रुपमा रहदै आएका सलाहले यस सिजन १९ गोल गरे । उनी गोल्डेन बुटको दाबेदारको शीर्ष पाँचमा रहे ।
इजिप्टका सलाह प्रिमियर लिगमा यस सिजन १० भन्दा बढी गोल र असिस्ट गर्ने तीन खेलाडी रहे । सलाहसँगै सिटीका केभिन डी ब्रुएन र टोटेनहमका सन ह्युङ् मिन पनि दोहोरो अंकको गोल र असिस्ट गर्ने खेलाडी रहे ।
लिभरपुलमा तीन सिजन बिताईसकेका सलाहले हरेक सिजन उत्कृष्ट खेलिरहेका छन् । गत सिजन क्लबलाई च्याम्पियन्स लिगको उपाधि दिलाउन सफल सलाहले यस इजं क्लबलाई लिगको उपाधि दिलाउन महत्वपूर्ण योगदान गरे ।
उनले लिभरपुलका लागि १०४ खेलमा ७३ गोल र २७ असिस्ट गरिसकेका छन् ।
५. नेयमार
यस सिजनको शीर्ष पाँच विंगरमा फ्रेन्च क्लब पेरिस सेन्ट जर्मेन (पीएसजी) नेयमार पनि एक हुन् ।
ब्राजिलियन नेयमारले यस सिजन क्लबका लागि उत्कृष्ट प्रदर्शन गरे । कोरोनाको कारण फ्रेन्च लिग पुरा नभएपनि नेयमारले खेलेको खेलमा आफ्नो कौशल भने देखाए ।
नेयमारले यस सिजन क्लबका लागि १९ गोल गरे । यस्तै गोलका लागि ८ असिस्ट समेत गरे ।
यस सिजन पीएसजीको केहि महत्वपूर्ण खेलमा नेयमारले निर्णायक गोल समेत गरे । नेयमारको उत्कृष्ट प्रदर्शनको कारण पीएसजीले यस सिजन लिग वान, फ्रेन्च कप र लिग कपको उपाधि समेत उचाल्यो ।
नेयमारले पीएसजीका लागि हालसम्म ७५ खेलमा ६५ गोल गरिसकेका छन् ।
