एन्फा रुपन्देहीद्वारा खेलाडी र रेफ्रीलाई राहत

मनोज थापा 

बुटवल । रुपन्देही जिल्ला फुटबल संघले कोरोना भाईरसबाट प्रभावित जिल्ला फुटबल लिग खेलेका खेलाडी र रेफ्रीहरुलाई राहत वितरण गरेको छ ।

रुपन्देहीले सोमबार खेलाडी र रेफ्रीगरी ३५ जनालाई कोभिड-१९ राहत वितरण गरेको हो । उनीहरुलाई जनही २ हजार १४२ रुपैयाँको दरले राहत दिईएको हो ।

खेलाडी तथा रेफ्रीलाई रुपन्देही जिल्ला फुटबल संघका अध्यक्ष तथा एन्फाका कार्यसमितिका सदस्य दिर्घ बहादुर केसीले नगद प्रदान गरेका थिए ।

अखिल नेपाल फुटबल संघ (एन्फा) ले उपलब्ध गराएको ७५ हजारबाट खेलाडीलाई राहत दिईएको संघले जनाएको छ ।

गत महिना एन्फाले आफ्ना सदस्य संघलाई ७५ हजार उपलब्ध गराएको थियो ।

कोरोनाकै महामारीको कारण यस वर्ष रुपन्देहीमा आयोजना हुने तिलोत्तमा गोल्डकप स्थगित गरिएको थियो ।

यस्तै बुटवलमा रहेको एन्फा एकेडेमी भवनलाई क्वारेन्टाइन स्थल बनाईएको छ ।