सिल्भा र जिससको गोलको सिटीको जित

एजेन्सी । इंग्लिस प्रिमियर लिग फुटबलमा म्यानचेस्टर सिटीले जित निकालेको छ ।

बुधबार राति भएको खेलमा सिटीले बर्नेमाउथलाई २-१ गोल अन्तरले पराजित गरेको हो ।

घरेलु मैदानमा सिटीलाई जित दिलाउन डेभिड सिल्भा र ग्राबियल जिससले एक एक गोल गरे ।

बर्नेमाउथका डेभिड ब्रुक्सले एक गोल फर्काए ।

खेलको छैटौं मिनेटमा सिल्भाले फ्रिकिकबाट गोल गर्दै सिटीलाई अग्रता दिलाएका थिए । ३९ औं मिनेटमा जिससले गोल गर्दा पहिलो हाफमा सिटी २-० ले अघि रह्यो ।

त्यसपछि खेलको ८८ औं मिनेटमा बर्नेमाउथका डेभिडले एक गोल फर्काएपनि सिटी २-१ ले विजयी भयो ।

घरेलु मैदानको जितसँगै सिटीले ३६ खेलमा ७५ अंक जोडेको छ । र, सिटीले च्याम्पियन लिभरपुलसँगको अंक दुरी समेत घटाएको छ ।

शीर्ष स्थानको लिभरपुलको ९३ अंक रहेको छ । सिटी लिभरपुल भन्दा १८ अंकले पछि रहेको छ ।

३१ अंक जोडेर बर्नेमाउथ रेलिगेसन क्षेत्रमा रहेको छ ।  यो हारसँगै बर्नेमाउथको रेलिगेसन सम्भावना बढेर गएको छ ।

प्रिमियर लिग अन्तर्गत नै अर्को खेलमा टोटेनहमले न्युकासल युनाइटेडलाई ३-१ गोल अन्तरले पराजित गरेको छ ।

टोटेनहमको जितमा ह्यारी केनले दुई गोल गरे । यस्तै सन ह्युङ मिनले एक गोल गरे । न्युकासलका म्याट रिट्चीले एक गोल फर्काए ।

त्यस्तै बर्नली र उल्भ्सले भने १-१ गोलको बराबरी खेल्दै अंक बाडेका छन्  ।