एट्लेटिकोलाई उछिन्दै सेभिया तेस्राे

एजेन्सी । स्पेनिस ला लिगा फुटबलमा सेभिया तेस्रो स्थानमा उक्लिएको छ ।

सोमबार राति भिया रियलबिरुद्धको खेलमा अंक जोड्दै सेभिया लिगको तेस्रो स्थानमा उक्लिएको हो ।

सेभियाले डिएगो सिमोन नेतृत्वको एट्लेटिको मड्रिडलाई पछि पार्दै तेस्रो स्थानमा उक्लिएको हो ।

सोमबार खेलमा सेभियाले भिया रियलसंग २–२ गोलको बराबरी खेल्दै एक अंक जोड्न सफल रह्यो ।

खेलमा अग्रता घरेलु टोली भिया रियलले १८ औं मिनेटमा पाको अल्केसरको गोलबाट लिएको थियो । ३९ औं मिनेटमा सेभियाका सर्जियो एस्कुडोले बराबरी गोल फर्काए ।

घरेलु टोली पुन पाउ टोरेसको गोलबाट २–१ ले अघि बढ्यो । तर ६३ औं मिनेटमा मुनिर अल हदादीले गोल गर्दै खेल बराबरीमा ल्याएका थिए ।

बराबरीको नतिजसंगै सेभियाले ५३ अंक जोड्दै तालिकाको तेस्रो स्थानमा उक्लियो । भिया रियल ४८ अंक सहित छैटौं स्थानमा यथावत छ ।

अर्को खेलमा लेगानेस र ग्रानाडाले गोल रहित बराबरी खेल्दै अंक बाँडेका छन् । लेगानेस २५ अंक सहित तालिकाको १९ औं स्थानमा छ ।

बराबरीको नतिजाले लेगानेसमाथि रेलिगेशनको दबाब थपिएको छ । ग्रानाडा ४३ अंक सहित तालिकाको नवौं स्थानमा छ ।