'मर्सीसाइड डर्बी'मा लिभरपुलकाे बराबरी

एजेन्सी । इंग्लिस प्रिमियर लिग फुटबलमा उपाधि नजिक रहेको लिभरपुल बराबरीमा रोकिएको छ ।

आइतबार राति भएको मर्सीसाइड डर्बी भिडन्त लिभरपुल एभर्टनसँग गोलरहित बराबरीमा रोकिएको हो ।

एभर्टनको मैदान गुडिसन पार्कमा पाएको मौकालाई सदुपयोग गर्न नसक्दा लिग लिडर लिभरपुल जितबाट बन्चित बनेको हो ।

बल पोजिसनमा एकतर्फी पकड जमाएपनि लिभरपुलले घरेलु टोलीको डिफेन्स र गोललाइन तोड्न सकेन। 

मोहमद सलाहबिना मैदान उत्रिएको लिभरपुलको केहि राम्रो प्रहार एभर्टनका गोलकिपर जोर्डन पिकफोर्डले बचाएका थिए ।

घरेलु टोलीले समेत केहि गोलको राम्रो अवसर खेर फालेको थियो ।

घरेलु टोलीसँगको बराबरीसँगै लिभरपुललाई उपाधि जित्न थप समय कुर्नुपर्ने भएको छ ।

उपाधि जित्नका लागि लिभरपुललाई अझै ५ अंकको आवश्यकता रहेको छ । 

लिभरपुल ३० वर्षपछि पहिलो पटक लिगको उपाधि जित्ने संघारमा रहेको छ ।

एभर्टनसँगको बराबरीपछि लिभरपुलले ३० खेलमा ८३ अंक जोडेको छ ।

लिभरपुल दोस्रो स्थानको म्यानचेस्टर सिटी भन्दा २३ अंकले अघि रहेको छ । सिटीको ६० अंक रहेको छ ।

३८ अंक जोडेको एभर्टन १२ औं स्थानमा रहेको छ ।