'क्लोप लिभरपुलका लागि सधै विशेष'

एजेन्सी । लिभरपुलका डिफेन्डर ट्रेन्ड एलेक्जेन्डर आर्नोल्डले मुख्य प्रशिक्षक योर्गेन क्लोप क्लबका लागि सधै विशेष रहने बताएका छन् ।

बीबीसी रेडियोसँग कुरा गर्दै आर्नोल्डले क्लोप लिभरपुल आएपछि सबै क्षेत्रमा परिवर्तन भएको र उनी क्लबका लागि सधै विशेष हुने बताएका हुन् ।

क्लोपले लिभरपुललाई गत सिजन च्याम्पियन्स लिगको उपाधि दिलाएका थिए । यस सिजन लिभरपुल प्रिमियर लिगको उपाधि नजिक रहेको छ ।

'क्लब पुरै परिवर्तन भएको छ । क्लबका विश्वासीहरु परिवर्तन भएका छन् । सबै जना एकै सोच्छन र उस्तै सपना देख्छन,' बीबीसीसँग आर्नोल्डले भने, 'तपाईले उनको कामलाई आदर गर्नु पर्छ ।'

लिभरपुल ३० वर्षपछि लिग उपाधिको संघारमा रहेको छ । लिभरपुल यस सिजन दोस्रो स्थानको म्यानचेस्टर सिटी भन्दा २२ अंकले अघि रहेको छ । र, उपाधिका लागि लिभरपुललाई दुई जितको आवश्यकता रहेको छ ।

लिभरपुलले २९ खेलमा ८२ अंक जोडेको छ । सिटीको ६० अंक रहेको छ ।

सन् २०१५ मा क्लब आएपछि क्लोपले लिभरपुललाई युरोपको उत्कृष्ट टिम बनाएका छन् । क्लोप आएको सिजन लिभरपुल लिगको १० औं स्थानमा रहेको थियो । तर, अहिले लिभरपुल फरक अवस्थामा रहेको छ ।

लिभरपुलले लिगमा आइतबार राति एभर्टनसँग खेल्दैछ । उक्त खेलमा जित हात पारेमा लिभरपुल उपाधि नजिक पुग्नेछ ।