अग्रता जोगाउन नसक्दा आर्सनल पराजित 

एजेन्सी । इंग्लिस प्रिमियर लिग फुटबलमा आर्सनल पराजित भएको छ ।

शनिबार भएको खेलमा आर्सनल ब्राइटनसँग २-१ गोल अन्तरले पराजित भएको हो ।

ब्राइटनको मैदानमा सुरुवाती अग्रता जोगाउन नसक्दा आर्सनल पराजित भएको हो ।

पहिलो हाफ गोलरहित बराबरी भएको खेलको ६८ औं मिनेटमा निकोलस पेपेले गोल गर्दै आर्सनललाई अग्रता दिलाएका थिए ।

तर, खेलको ७५ औं मिनेटमा लेविस डुंकले गोल गर्दै ब्राइटनलाई १-१ गोलको बराबरीमा फर्काए ।

त्यसपछि खेलको इन्जुरी समयमा निल मपेले गोल गर्दै ब्राइटनलाई २-१ को जित दिलाए ।

त्यसअघि खेलको ४० औं मिनेटमा आर्सनलका पहिलो रोजाईका गोलकिपर बर्न्ड लिनो चोट बोक्दै मैदानबाट बाहिरिएका थिए ।

यससँगै कोरोना भाईरसको कारण स्थगित लिग सुचारु पछि आर्सनलले लगातार दोस्रो हार व्यहोरेको छ । यस अघि आर्सनल म्यानचेस्टर सिटीसँग पराजित भएको थियो ।

यो हारसँगै आर्सनलले ३० खेलमा ४० अंक जोडेको छ । आर्सनल नवौं स्थानमा रहेको छ ।

आर्सनललाई हराउँदै ३२ अंक जोडेको ब्राइटन १५ औं स्थानमा रहेको छ ।