ला लिगा : बार्सिलोनालाई मालोर्काको चुनौती 

एजेन्सी । कोरोना भाईरसको महामारीबीच सुचारु स्पेनिस ला लिगा फुटबलमा आज (शनिबार) चार खेल हुँदैछ ।

ला लिगामा शनिबार बार्सिलोना, स्पानियोल, भिया रियल लगायतका क्लबले प्रतिस्पर्धा गर्नेछन् ।

लिग लिडर बार्सिलोनाले लिग सुचारुपछिको पहिलो खेलमा मालोर्कासँग खेल्दैछ ।

मालोर्काको मैदानमा हुने खेल नेपाली समय अनुसार राति १:४५ बजे सुरु हुनेछ ।

रेलिगेसन क्षेत्रको मालोर्काविरुद्ध बार्सिलोना सहज जितको लक्ष्यसहित मैदान उत्रने छ ।

घरेलु टोलीलाई पराजित गर्दै बार्सिलोना दोस्रो स्थानको रियल मड्रिडसँगको अंक दुरी फराकिलो बनाउने योजनामा हुनेछ ।

लिगमा ५८ अंक जोडेको बार्सिलोना रियल भन्दा २ अंकले अघि रहेको छ । रियलको ५६ अंक रहेको छ । मालोर्का २५ अंक जोडेर पुछारबाट तेस्रो स्थानमा रहेको छ ।

मालोर्काको भ्रमण गर्दा बार्सिलोनाका फरवार्ड लुइस स्वारेज मैदान फर्कने सम्भावना रहेको छ । गत जनवरीमा घुँडाको शल्यक्रिया गरेका स्वारेज फिट भईसकेका छन् ।

यस्तै प्रशिक्षणको दौरान चोट बोकेका कप्तान लियोनल मेस्सी समेत फिट भईसकेका छन् ।

ला लिगा अन्तर्गत नै स्पानियोलले घरेलु मैदानमा डिपोर्टिभो अल्भेससँग खेल्नेछ ।

त्यस्तै सेल्टा भिगोले भिया रियल तथा लेगानेसले रियल भालाडोलिटसँग खेल्नेछ ।