‘केन राख्न टोटेनहमलाई उपाधि आवश्यक’

एजेन्सी । प्रशिक्षक टोनी पुलिसले ईङ्लिस फरवार्ड ह्यारी केनलाई क्लबमा राख्न टोटेनहमलाई उपाधि जित्न आवश्यक रहेको बताएका छन् ।

उनले क्लबको उपाधि विहिन यात्रालाई तोड्न जोसे माउरिन्हो भन्दा अरु ब्यक्ती उपयुक्त नहुने भन्दै केनलाई राख्न टोटेनहमलाई उपाधि जित्न आवश्यक रहेको बताएका हुन् ।

मार्चको अन्तिममा ईङ्ल्याण्डका कप्तान केनले आफु बाल्यकालको क्लबमा नबस्ने बताएका थिए । केनको भनाईसंगै युरोपका ठुला क्लबले उनीमाथि चासो समेत राखेका थिए ।

गत सिजन च्याम्पियन्स लिगको फाईनलमा पराजित भएसंगै टोटेनहम उपाधिबाट बञ्चित भएको थियो । गत नोभेम्बरमा क्लबले प्रशिक्षक मौरिसियो पोचिटिनोलाई बर्खास्त समेत गरेको थियो ।

जोसे माउरिन्होको नेतृत्वमा लक्ष्य प्राप्तिका लागि केनलाई राम्रोसंग राखिएको हुन सक्ने प्रशिक्षक पुलिस विश्वास गर्छन् ।

‘टोटेनहमले उपाधि जित्न सुरु गरिसकेको छ । मलाई लाग्दैन, तिमी केनको धेरै आलोचना गर्न सक्छौ ।’ स्टोक सिटी, क्रिस्टल प्यालेस र वेस्ट ब्रुमका पूर्व प्रशिक्षकले एक अन्तरवार्तामा भने ।

‘उनी क्लब र अन्तराष्ट्रिय स्तरमा ठुला खेलाडी हुन् । पोचिटिनोको नेतृत्वमा पछिल्ला तीन वा चार बर्षमा टोटेनहम ठुलो टिम बनेको छ । यदी पछिल्ला तीन वा चार बर्षमा टोटेनहमले केही जित्न नसकेर मलाई आश्चार्य बनाएको छ ।’ उनले भनेका छन् ।

‘उनी जित्न चाहन्छन् । उनी महत्वकाक्षी बन्न चाहन्छन् । उनी टोटेनहममा खुसी छन् । उनी एक शानदार फुटबल क्लबमा छन् । नयाँ स्टेडियम र प्रशिक्षण सुविधा धेरै राम्रो छ ।’ उनले भने, ‘तर केनले जित्न चाहन्छन् । उनीसंग त्यस्ता प्रशिक्षक छन्, जो सधै जित्न चाहन्छन् ।’

प्रशिक्षक पुलिसले माउरिन्होले पोर्टो, चेल्सी र ईन्टर मिलानमा बिताएको गौरवपूर्ण दिनको स्मरण गर्दै पोर्चुगाली प्रशिक्षकलाई सबै भन्दा धेरै सम्मान दिने बताए ।

‘उनी उत्कृष्ट प्रशिक्षक हुन् । कीर्तिमानले त्यही भन्छ । उनी फुटबल खेल जित्न सक्छन् ।’ उनी थप्छन् ।

‘उनलाई समय आवश्यक छ । समाजमा र बिशेष गरि खेलमा सबै भन्दा ठुलो समस्या भनेको मानिस रातारात सबै चिज बनेको चाहन्छन् ।’ उनले भने, ‘माउरिन्होलाई राम्रो अवसर मिलेको छ । संसारका अरु कुनैपनि प्रशिक्षक भन्दा उनलाई राम्रो मौका मिलेको छ ।’