अंग्रेजी सिक्दै बाबर

एजेन्सी । पाकिस्तानको एकदिवसीय क्रिकेट टिमका कप्तान बाबर आजमले अंग्रेजी भाषाको कक्षा लिन सुरु गरेका छन् ।

अंग्रेजी भाषा सुधारका लागि नवनियुक्त कप्तान बाबरले कक्षा लिन थालेका हुन् ।

पाकिस्तान क्रिकेट बोर्डले दुई साता अघि बाबरलाई एकदिवसीयको कप्तान चयन गरेको थियो ।

बाबरले आफु सबै फर्म्याटको कप्तान बन्ने लक्ष्यसहित अंग्रेजी राम्रो बनाउन कक्षा लिन थालेको बताएका छन् ।

कप्तान बनेपछि अन्तर्राष्ट्रिय स्तरमा खेलाडी तथा मिडियामा राम्रोसँग कुराकानी गर्न पनि कक्षा लिन सुरु गरेको उनले बताए ।

'आजकल आफ्नो ब्याटिङसंगै अंग्रेजीलाई समेत ध्यान दिन थालेको छु,' बाबरले भने ।

बाबरलाई मिडियासामु सरल तरिकाले आफ्नो बिचार राख्न पाकिस्तानी फास्ट बलर तनवीर अहमदले सल्लाह दिएका थिए ।

कप्तान चयनपछि मिडियासँग प्रश्नोत्तर गर्न राम्रो अंग्रेजी हुनुपर्ने तनवीरले बताएका थिए ।

उत्कृष्ट प्रदर्शनको कारण दाँया हाते ब्याट्सम्यान बाबरको विश्वका शीर्ष ब्याट्सम्यानसँग तुलना हुँदै आएको छ ।