एजेन्सी । कोरोनाको महामारीबीच जारी जर्मन बुन्डेसलिगा फुटबलमा आज (आइतबार) बोरुसिया डर्टमण्डले पार्डाबोनसँग प्रतिस्पर्धा गर्दैछ ।
उपाधि दाबेदार मानिएको डर्टमण्डले पुछारको पार्डाबोनसँग उसैको घरेलु मैदानमा खेल्नेछ । खेल नेपाली समय अनुसार राति ९:४५ बजे सुरु हुनेछ ।
पार्डाबोनविरुद्ध सहज जित निकाल्दै डर्टमण्ड लिग लिडर बायर्न म्युनिखसँगको अंक दुरी कम गर्ने योजनामा हुनेछ ।
तर, पार्डाबोनको मैदानमा मुख्य स्ट्राइकर अर्लिङ हालाण्ड र मिडफिल्डर ममुड डाहुडको अभाव डर्टमण्डलाई हुनेछ । हालाण्ड र डाहुडले बायर्नविरुद्धको खेलमा चोट बोकेका थिए ।
डर्टमण्ड बायर्न भन्दा १० अंकले पछि रहेको छ । बायर्नको २८ खेलमा ६७ अंक रहेको छ । डर्टमण्डको ५७ अंक रहेको छ ।
कमजोर मानिएको टिम पार्डाबोनलाई हराएमा डर्टमण्डले बायर्नसँगको अंक दुरी ७ मा झार्नेछ ।
कोरोनाले लिग स्थगित हुँदासम्म ४ अंकले पछि रहेको डर्टमण्ड गत मंगलबार घरेलु मैदानमा १-० ले पराजित भएपछि बायर्नसँग फराकिलो अन्तरले पछि परेको हो ।
उपाधि होडलाई कायम राख्न पनि डर्टमण्डलाई पार्डाबोनविरुद्ध जित निकाल्नु आवश्यक रहेको छ । पार्डाबोन १९ अंक जोडेर पुछारमा रहेको छ ।
यस्तै अर्को खेलमा बोरुसिया मन्छेनग्लाडबाखले युनियन बर्लीनको सामना गर्नेछ ।
