फ्रेन्च लिग रद्दबारे पुनर्विचार गर्न आग्रह

एजेन्सी । फ्रेन्च क्लब लियोनका अध्यक्ष जिन मिसेल औलासले लिग वन फुटबल रद्द गर्ने निर्णयबारे पुनर्विचार गर्न आग्रह गरेका छन् ।

अध्यक्ष जिनले फ्रान्सका प्रधानमन्त्री र खेलकुद मन्त्रीलाई पत्र लेख्दै सिजन चाँडै अन्त्य गर्ने निर्णयमा पुनर्विचार गर्न आग्रह गरेका हुन् ।

कोरोना भाईरसको महामारीको कारण गत अप्रिल २ मा फ्रेन्च लिग रद्द भएको घोषणा गरिएको थियो ।

लिग रद्द भएसँगै शीर्ष स्थानको पेरिस सेन्ट जर्मेन (पीएसजी) च्याम्पियन बनेको थियो ।

तर,अध्यक्ष जिनले जर्मन बुन्डेसलिगा सुचारु भएको तथा स्पेन र इंग्ल्यान्डमा सुचारुको तयारी भईरहेको भन्दै निर्णय पुनर्विचार गर्न माग गरेका छन् ।

'बुन्डेसलिगा मे १६ बाट सुचारु भयो । स्पेनमा जुन ८ बाट सुचारु हुनेछ । इटाली, रुस र पोर्चुगलमा टिमको प्रशिक्षण सुचारु भएको छ । र, इंग्ल्यान्डले जुन १९ मा सुचारु गर्ने तयारी गरेको छ,' अध्यक्षले लेखेको पत्रमा भनिएको छ, 'फ्रान्समा किन चाँडो रद्द गरियो । व्यवसायिक फुटबलको अवमूल्यन गर्न सकिदैन ।'

यस सिजनको लिग रद्द हुँदा लियोन सातौं स्थानमा रहेको थियो । जसको कारण लियोन युरोपियन छनोट खेल्न बन्चित भएको थियो ।

'हामी कल्पना गर्न सक्छौ कि गल्ति सुधार गर्दै जुन २ बाट प्रशिक्षण गर्न सक्छौ र जुलाई वा अगष्टमा लिग सकाउन सक्छौं,' अध्यक्ष जिनले भनेका छन् ।