एजेन्सी । प्रिमियर लिग क्लबहरु सिजनका बाँकी खेल सक्न प्रतिबद्ध देखिएका छन् ।
शुक्रबार क्लबका प्रतिनिधिबीच करिब चार घण्टा चलेको छलफलले बन्द रंगशालामा सिजनका बाँकी खेल सक्ने बिषयमा क्लबहरु प्रतिबद्ध देखिएका हुन् ।
बैठकले जुनबाट सुरु गर्ने तयारी गरिएको सिजनका बाँकी खेल 'न्युट्रल भेन्यु' अर्थात तठस्थ भूमीमा गर्ने सहमती जुटाएको छ ।
प्रिमियर लिगले सरकारसंग आफ्नो योजना स्विकृतीका लागि पेश गर्ने तयारी समेत गरेको छ ।
बैठकले देशभरका सहरी क्षेत्रबाट बाहिर रहेका १० तठस्थ मैदानमा खेल खेलाउने सहमती जुटाएको हो ।
प्रिमियर लिगले मे १८ बाट अभ्यास सुरु गर्ने र जुन ८ बाट सिजनका बाँकी खेल सुरुवात गर्ने तयारी गरेको छ ।
वेस्ट ह्यामको लण्डन स्टेडियम, म्यान्चेष्टर सिटीको ईतिहाद स्टेडियम,र आर्सनलको ईमिरेट्स स्टेडियमलाई सम्भावित मैदानको रुपमा हेरिएको छ ।
त्यस्तै, नर्विचको काररो रोड, वर्नेमाउथको भिटालिटी स्टेडियम र भिल्ला पार्कलाई तठस्थ मैदान बनाउने बिषयमा छलफल भएको छ ।
लिगले जारी गरेको बिज्ञप्तीमा भनिएको छ, ‘प्रिमियर लिगका सरोकारवाला पक्षबीच छलफल भएको छ । क्लबहरुले सिजनका बाँकी खेल सुरुवात गर्नका लागि सम्भावित कदमबारे आफ्नो राय राखेका छन् ।’ सबै विचार कोरोनाको महामारीबाट सिधै प्रभावित मानिसको साथमा छ । र प्रिमियर लिगको प्राथमिकता खेलाडी, प्रशिक्षक, अफिसियल तथा समर्थकको स्वास्थ्य र सुरक्षा रहेको छ ।’
‘बैठकले कुनै निर्णय गरेको छैन । सिजनको बाँकी खेलको सुरुवात गर्ने बिषयमा क्लबका प्रतिनिधिबीच विचार आदन प्रदान भएको छ । यो पनि सहमती भएको छ कि पीएफए, एलएमए, खेलाडी तथा म्यानेजर यस प्रक्रियाका लागि महत्वपूर्ण छन् । अगामी दिनमा उनीहरुसंग समेत परामर्श गरिनेछ ।’ बिज्ञप्तीमा भनिएको छ ।
कोरोनाकै कारण फ्रेन्च लिग सहित डच लिग समेत रद्ध गरिएको छ । तर प्रिमियर लिग कुनै कानुनी अवरोध बिना सरकारसंग अनुमती लिएर सिजनका बाँकी खेल सक्न प्रतिबद्ध देखिएको छ ।
गत रातिमात्र फ्रेन्च क्लब लियोनले लिग वानको उपाधि पेरिस सेन्ट जर्मेन (पीएसजी)लाई प्रदान गरेपछि कानुनी उपचार खोज्ने बताएको छ ।
प्रिमियर लिगका सरोकारवालाको अर्को बैठक मे १८ मा बस्नेछ । त्यसअघि अफिसियल, म्यानेजर सहितको बैठकले बाँकी सिजनको वृहत योजना तयार गर्नेछ ।
कोरोना महामारीका कारण प्रिमियर लिग करिब दुई महिनासम्मका लागि स्थगित अवस्थामा छ ।
शुक्रबारको बैठकको मुख्य उद्धेश्य लिग र क्लबबीच प्रशिक्षणको दौरान पालना गर्नुपर्ने नियममा सहमती जुटाउने रहेको थियो । बेलायत बाहिरबाट आउने खेलाडीले कम्तिमा दुई हप्ता एकान्तवासमा बस्नुपर्ने नियम बनाईएको छ ।
कोरोनाबाट सबै भन्दा बढी प्रभावित मुलुक मध्य बेलायत समेत एक हो । कोरोनाका कारण बेलायत सबै भन्दा धेरै ज्यान गुमाउने तेस्रो मुलुक हो ।
