सुमनको स्मृतिमा मञ्चको परोपकारी कार्यक्रम

काठमाडौं । नेपाल खेलकुद पत्रकार मञ्च (एनएसजेएफ)ले खेल पत्रकार सुमन भोम्जनको स्मृतिमा परोपकारी कार्यक्रमको आयोजना गरि मनाएको छ ।

मञ्चले भोम्जनको बार्षिक पुण्यतिथिमा समन्वय शाखा हेटौडासंग सहकार्य गरेर भोम्जनको जन्मस्थान हेटौंडामा रहेको बृद्धाश्रममा भोजन कार्यक्रम आयोजना गरेको हो ।

भोम्जन हेटौडा समन्वय शाखाका संस्थापक अध्यक्ष समेत हुन् । २०७२ सालको बिनाशकारी भुकम्पमा परि उनको निधन भएको थियो ।

मञ्चले उनको पुण्यतिथिमा स्मृति सभाको आयोजना गर्दै आएको थियो । तर विश्वब्यापी कोरोना भाईरसको संक्रमणको कारण लकडाउनको अवस्थामा मञ्चले यस बर्ष औपचारिक कार्यक्रमको आयोजना सम्भव नभएकाे बताएकाे छ। 

भोजन कार्यक्रममा हेटौंडा शाखाका अध्यक्ष राजन दाहाल, भोम्जनकी आमा विमला, दाजु, मदन तथा राष्ट्रिय फुटबल टिमका फरवार्डद्धय रञ्जन विष्ट र अन्जन विष्ट सहितको टोली पुगेका थिए ।

मञ्चले ओम बृद्धाश्रमका अध्यक्ष बुद्धिप्रसाद पौडेललाई १० हजार रुपैयाँ हस्तान्तरण गरेको थियो । आश्रममा ४० जना बृद्धबृद्धाहरु रहेका छन् ।

कार्यक्रममा मञ्चका अध्यक्ष दुर्गानाथ सुवेदी (देबेन्द्र)ले एक होनहार युवा खेलकुद पत्रकार भोम्जनको अभाव मञ्च र खेलकुद क्षेत्रमा सदा रहने बताए ।

'सुमन सधै हाम्रो मनमा रहदै आएको छन्। उनको पाँचौ वार्षिकीमा मञ्च परिवार उनको चिरशान्तीको पुन कामना गर्दछु ।' सुबेदीले भने ।

गोरखापत्रका संस्थानमा कार्यरत भोम्जन भूकम्प गएको दिन काठमाडौंको असन छेउको डेराको भुईतल्लामा पुरिन पुगेका थिए । भूकम्पको ८ दिनपछि मात्र उनी भेटिएका थिए।

उनको शव बैशाख १९ गते भेटिएकोले मञ्चले सोही दिन वार्षिक पुण्यतिथि मनाउने गरेको हो।