आईसीसी बैठक : कोरोनाकाे चुनौती मिलेर लड्न सहमत

एजेन्सी । अन्तर्राष्ट्रिय क्रिकेट परिषद (आईसीसी) को प्रमुख कार्यकारी समितिको बैठक विहिबार बसेको छ ।

कोरोना भाईरसको महामारीको कारण भिडियो कलमार्फत समितिको बैठक बसेको हो । तर, बैठकमा महत्वपूर्ण निर्णय भने नभएको आईसीसीले जनाएको छ ।

बैठकमा १२ पूर्ण सदस्य राष्ट्र र ३ एसोसियट राष्ट्रको सहभागिता रहेको थियो । बैठकमा सहभागी राष्ट्रले कोरोनाको कारण क्रिकेटमा उत्पन्न चुनौती मिलेर सामना गर्न भने प्रतिवद्धता जनाएका थिए । सहभागी राष्ट्रले कोरोनाको प्रभावबारे जानकारी गराएका थिए ।

ठुला प्रतियोगिताका विभिन्न योजनाहरुलाई भने जारी राख्ने सहमति भएको आईसीसीले जनाएको छ । जसमा पुरुष टी-ट्वान्टी विश्वकप र सन् २०२१ को महिला विश्वकप समेत रहेको छ ।

यस्तै कोरोनापछि क्रिकेट सुचारु गर्ने विषयमा समेत छलफल भएको थियो  । 

'अन्तर्राष्ट्रिय क्रिकेट फेरि सुरु गराउने सम्बन्धमा जिम्मेवार निर्णय लिनुपर्नेमा सहमत भयौं,' आईसीसीका प्रमुख कार्यकारी मनु श्वानेले भने, 'आईसीसीको विश्वव्यापी कार्यक्रमहरु सम्पन्न गर्न जटिलताहरू विस्तृत छन् । हामी यसमा संलग्न सबैको स्वास्थ्य र सुरक्षाको रक्षा गर्नका लागि तयार छौं ।'

बैठकमा विभिन्न राष्ट्रको भ्रमण कार्यक्रम बारेमा समेत छलफल भएको बताईएको छ । सन् २०२३ सम्म तय भएको प्रतियोगिताहरु सम्भव भएसम्म पुन: हेरफेर गर्न सकिने जनाईएको छ ।

विश्व टेष्ट च्याम्पियनसिप र क्रिकेट विश्वकप सुपर लिगको बारेमा आगामी दिनमा विचार गरिने आईसीसीले जनाएको छ ।

अष्ट्रेलिया क्रिकेटका प्रमुख कार्यकारी केभिन रोबर्ट्सले आईसीसी र आफ्नो स्थानीय आयोजक कमिटिले विश्वकपको बारे निरन्तर छलफल गरिरहेको बताए ।

'क्रिकेट अष्ट्रेलियाले नजिकबाट आईसीसी र स्थानीय आयोजक कमिटिसंगै अष्ट्रेलिया सरकारसँग मिलेर टी-ट्वान्टी विश्वकप अक्टोबरमा खेलाउन सकिने वा नसकिने विषयमा छलफल गर्दै आएका छौं,' उनले भने 'हामीले यो प्रतियोगिताको लागि सबैको राय लिदै आएका छौं । सबैलाई सुरक्षितका साथ यस्तो उत्कृष्ट प्रतियोगिता आयोजना गर्दै खुसियाली मनाउन चाहान्छौं ।'