कोरोनाबाट सचेत रहन भलिबल खेलाडीको आग्रह

काठमाडौं । विश्वभर महामारीको रुपमा फैलिएको कोरोना भाईरसबाट जोगिन नेपाली राष्ट्रिय भलिबल टिमका खेलाडीहरुले आग्रह गरेका छन् ।

राष्ट्रिय टिमका महिला तथा पुरुष खेलाडीले खेलपाटीसँग कुरा गर्दै कोरोनाको संक्रमणबाट जोगिन आग्रह गरेका हुन् ।

उनीहरुले सरकारको निर्देशन पालना गर्दै सुरक्षाको उपायहरु अपनाउन समेत आग्रह गरेका छन् ।

चीनबाट सुरु भएको कोरोना भाईरस विश्वभर फैलिएको छ । जसका कारण हजारौको ज्यान समेत गएको छ । लाखौ मानिसमा संक्रमण देखिएको छ ।

नेपालमा समेत ३ जनामा कोरोनाको संक्रमण देखिएको छ ।

त्यसैले कोरोनाको संक्रमणबाट जोगिन सरस्वती चौधरी, प्रतिभा माली, धन बहादुर भट्ट र कुल बहादुर थापाले अनुरोध गरेका छन् ।

लकडाउनपछिको खेलाडीको दैनिकी र कोरोनाबाट जोगिन भलिबल खेलाडीको सुझाब उनीहरुकै शब्दमा ।

सरस्वती चौधरी (एपीएफ )

हाम्रो बिदा छैन । तर,कोरोनाको त्रासले घर बाहिर पनि निस्कन पाएको छैन । आफै सेल्फ ट्रेनिङमा बसेको छु ।

कोरोनाको भाईरसबाट जोगिन सरकारले भनेको कुराहरु पालना गर्नुहोस् । घर बाहिर ननिस्कनु । साबुन पानीले हात धुने गर्नुहोस् । सरसफाईमा ध्यान दिनुहोस् । सहज रहनु होस्।

कुल बहादुर थापा (पुलिस)

लकडाउन हुनु भन्दा एक दिन अगाडी घर (बुटवल) आएको छु । १५ दिन भएको छ घर बसेको किनकि जताततै कोरोनाको त्रास छ ।

ढाडको चोटले गर्दा प्रशिक्षण गर्न मिल्दैन त्यसैले आराम गरिरहेको छु । सबै खेल प्रेमी दर्शकहरुलाई आफ्नो ख्याल गर्न भन्न चाहन्छु । पहिलो कोरोना लाग्न नदिनु नै राम्रो हो । त्यसैले घरमै बस्नुहोस् । भेटघाट कम गर्नु होस् ।

प्रतिभा माली (न्यु डाइमण्ड)

मेरो लागि २ महिना भईसक्यो लकडाउन भएको । चोट बोकेपछि बेड रेस्टमा छु ।

अहिले घरमै सामान्य अभ्यास गर्ने गरेको छु । बैशाखी बिना हल्का हिड्न थालेको छु ।

कोरोनाको कारण धेरै चहलपहल छैन । सबै जना आफै सजग छन् । म पनि सजग छु । साबुन पानीले हात धुने गरेको छु ।

कोरोनाको औषधि बनेको छैन । त्यसैले यसको औषधि भनेकै घरमा बस्ने हो जस्तो लाग्छ ।

धन बहादुर भट्ट (आर्मी)

मेरो जमदारको बढुवाको लागि ट्रेनिङ थियो । तर, लकडाउनले अहिले रोकिएको छ । घरमै बसेको छु । बाहिर निस्किएको छैन । अफिसको छुट्टि छैन । अफिसले जति बेला फोन आउछ त्यसको आधा घण्टामा अफिस हाजिर हुनु भनेको छ ।

कोरोनाको संक्रमणबाट जोगिन बाहिर ननिस्की घरमै बस्नुहोस् । निस्कनु परे मास्क लगाएर निस्कनु होला । साबुन पानीले राम्ररी हात धुने गर्नुहोस् । आफ्नो ख्याल गर्नुहोस् ।