कोरोनासँग लड्न युवराज र केफको साझेदारी आवश्यक !

एजेन्सी । सन् २००२ को जुलाई १३ भारतीय क्रिकेटका लागि निकै खास रहेको थियो ।

त्यो दिन मोहम्मद केफ र युवराज सिंहले इंग्ल्यान्डविरुद्ध नेटवेस्ट ट्रफीको फाइनलमा छैटौं विकेटको लागि १ सय २१ रनको साझेदारी गर्दै भारतलाई ट्रफी जिताउन सफल भएका थिए ।

लर्ड्स मैदानमा मोहमद र युवराजको साझेदारीले इंग्ल्यान्डले दिएको ३ सय २६ रनको फराकिलो लक्ष्य भेट्टाउन सफल भएको थियो । खेलमा भारत २ विकेटले विजयी भएको थियो ।

१८ वर्षपछी केफ र युवराजको त्यो साझेदारी पुन: चर्चामा आएको छ ।

भारतीय प्रधानमन्त्री नरेन्द्र मोदीले पूर्व क्रिकेटर युवराज र केफको तारिफ गरेका छन् । खासमा यो क्षण मोदीको 'जनता कर्फ्यु' को समर्थनमा ट्वीट भएको थियो ।

'यी दुई सानदार क्रिकेटरको साझेदारीलाई हामीलाई सधै याद रहने छ,' मोदीले केफको ट्वीटमा जवाफ दिदै भनेका छन्, 'यो अर्को साझेदारी गर्ने बेला आएको छ । यो पटक कोरोना भाईरसविरुद्धको लडाईमा सबै भारतले भाग लिने छन् ।'

उनले युवराजलाई समेत ट्याग गरेका छन् ।

केफ र युवराजले पनि कोरोनाको महामारीविरुद्ध लड्न आग्रह गरेका छन् ।

आइतबार हुने 'जनता कर्फ्यु' को पालना गर्न मोदीले भारतीय जनतालाई आग्रह गरेका छन् ।

मोदीले आइतबार राति ९ बजेसम्म आवश्यक सेवामा सामेल हुने व्यक्ति बाहेक अन्यलाई घरबाट बाहिर ननिस्कन आग्रह गरेका छन् ।