पोग्बामाथि सोल्सायरकाे विश्वास

एजेन्सी । प्रशिक्षक ओले गुनर सोल्सायरले फ्रान्सेली स्टार पाउल पोग्बा अर्को सिजन समेत म्यान्चेष्टर युनाईटेडमै रहने बताएका छन् ।

फ्रान्सेली स्टार पछिल्लो समय ओल्डट्राफोर्डबाट बाहिने धेरैको अनुमान छ । उनी सन् २०१६ मा ईटालियन महारथी युभेन्ट्सबाट युनाईटेड फर्किएका थिए ।

पोग्बाले आफु युनाईटेडमा खुसी नरहेको बताउँदै आएका छन् । प्रिमियर लिग असफल भएपछि उनी युनाईटेड छाड्न चाहेका छन् ।

पोग्बाका एजेन्ट मिने रायोलाले फ्रान्सेली मिडफिल्डर समरसम्म मात्र क्लबमा प्रतिबद्ध रहेको बताएका थिए । स्पेनिस महारथी रियल मड्रिड र युभेन्ट्सले २६ बर्षका मिडफिल्डरलाई अनुबन्धन गर्न प्रयास गरिरहेका छन् ।

पोग्बाको फिटनेसका कारण उनीको भविष्य युनाईटेडमा देखिन छाडेको अनुमान गरिदैछ । उनले यस सिजन समेत सबै प्रतियोगितामा मात्र ८ खेलमा प्रतिस्पर्धा गर्न पाएका छन् । उनी चोटका कारण डिसेम्बरसम्मका लागि अहिले मैदान बाहिर छन् ।

प्रशिक्षक सोल्सायरले विश्वकप विजेता स्टार अर्को हप्ता टिममा आबद्ध हुने आशा ब्यक्त गरेका छन् ।

‘पोग्बा हाम्रो खेलाडी हुन् । उनीसंगको सम्झौता अझै दुई बर्ष बाँकी छ । एक बर्ष थप गर्ने विकल्प समेत छ ।’ सोल्सायरले भनेका छन् ।

बिहिबार मात्र युरोपा लिगको अन्तिम १६ को दोस्रो लेगमा युनाईटेडले अष्ट्रियाको क्लब लास्कलाई ५–० गोल अन्तरले पराजित गरेको थियो ।

‘तपाईहरु उनी अर्को सिजन क्लबमा रहने आश गर्न सक्नु हुन्छ ।’ उनले थपेका छन् ।

विश्वका महङ्गा खेलाडी बिनै युनाईटेडले पछिल्लो समय प्रर्दशनमा सुधार गरेको छ ।

अष्ट्रिया क्लबबिरुद्ध जित निकाल्दै युनाईटेड पछिल्ला ११ खेलमा अपराजित छ । युनाईटेड युरोपा लिगको क्वार्टरफाईनलमा प्रवेश गरेको छ । र क्लब प्रिमियर लिगको पाँचौ स्थानमा छ ।

गत जनवरीमा अनुबन्धित भएका ब्रुनो फर्नान्डेसबाट प्रेरित युनाईटेडले पछिल्लो समय प्रर्दशनमा उल्लेख्य सुधार गरेको छ ।

पोर्चुगलका अन्तराष्ट्रिय स्टार फर्नान्डेसले युनाईटेडमा पोग्बालाई स्थानान्तरण गर्न सक्ने धेरैले दाबी गर्ने गरेका छन् ।