आर्सनल प्रशिक्षकलाई कोरोनाकाे संक्रमण

एजेन्सी । लण्डन क्लब आर्सनलका मुख्य प्रशिक्षक मिकेल अर्टेटामा कोरोना भाईरसको संक्रमण देखिएको छ ।

चेक जाँचको क्रममा प्रिमियर लिग क्लबका प्रशिक्षकलाई कोरोनाको पोजेटिभ लक्षण देखिएको छ ।

अर्टेटामा देखिएको लक्षणसंगै शनिबार हुने आर्सनल र ब्राईटोनबीचको खेल स्थगित गरिएको छ ।

आर्सनलले पछिल्लो अवस्थामा अभ्यास सत्र बन्द गरेको छ । अर्टेटाको सम्पर्कमा रहेको स्टाफलाई समेत छुट्टै बसालेर जाँच प्रक्रिया अघि बढाईएको छ ।

विकसित पछिल्लो घटनाक्रमबारे छलफल गर्न प्रियिमर लिगले समेत क्लबहरुको आकस्मिक बैठक बोलाएको छ । बैठकले प्रिमियर लिग क्लबको नयाँ तालिकाको बिषयमा निर्णय लिनेछ ।

'यो निकै निराशाजनक क्षण हो ।' ३७ बर्षका अर्टेटाले भनेका छन् ।

'निकै गलेको महशुश भएपछि मैले परिक्षण गरेको थिए । जति सक्दो चाँडो काममा फर्कनेछु ।' उनले भनेका छन् ।

आर्सनलले आशंका गरिएका केही व्यक्तिलाई छुट्टै राखेर जाँच प्रक्रिया अघि बढाएको छ । त्यसमा फुटबल टिमका अधिकांश सदस्य समेत रहेका छन् ।

अर्टेटाको परिक्षण पुष्टि भएसंगै ब्राईटन एक बिज्ञप्ती जारी गर्दै खेल नहुने बताएको थियो ।

'हाम्रो मानिसका स्वास्थय र सर्वसाधारणको स्वास्थ्य प्राथमिकतामा छ । हामी यसैमा केन्द्रित छौ ।' आर्सनलका प्रबन्ध निर्देशक विनय वेन्कटेशमले भनेका छन् ।

कोरोनाकै कारण बुधबारका लागि तय आर्सनल र म्यान्चेष्टर सिटीबीचको खेल स्थगित भएको थियो । ओलम्पियाकोसको मालिकमा कोरोनाको संक्रमण देखिएपछि सबै खेलाडी छुट्टै बसेर कोरोनाको परिक्षण प्रक्रियामा जुटेका थिए ।

बेलायतमा फैलदो कोरोनाको संक्रमणले प्रिमियर लिग क्लबका खेलाडी र अफिसियललाई समेत प्रभावित पारेको छ ।

बिहिबार मात्र लेस्टर सिटीका तीन खेलाडीमा कोरोना भएको पुष्टि भएको छ ।