ललितपुर पेट्रियट्समा तीन पाकिस्तानी खेलाडी

काठमाडौं । साविक विजेता ललितपुर पेट्रियट्सले चौथो संस्करणको एभरेष्ट प्रिमियर लिग (ईपीएल) टी-ट्वान्टी क्रिकेटका लागि तीन पाकिस्तानी खेलाडी अनुबन्ध गरेको छ ।

ललितपुरले सोमबार प्रेस विज्ञप्ति निकाल्दै ईपीएलका लागि तीन पाकिस्तानी खेलाडी अनुबन्ध गरेको जनाएको छ ।

ललितपुरले अलराउन्डर हसन खान, हमाद आजम र बलर मिर हाम्जालाई अनुबन्ध गरेको हो ।

हसन पाकिस्तानको यू-१९ टोलीका पूर्व कप्तान हुन् । उनी २०१८ को यू-१९ विश्वकपमा कप्तान रहेका थिए ।

यस्तै पाकिस्तान प्रिमियर लिग खेल्दै आएका हसनले क्यानाडाको ग्लोबल टी-ट्वान्टी खेलिसकेका छन् ।

मिरसँग इंग्ल्यान्डमा काउन्टी क्रिकेट खेलेको अनुभव रहेको छ । उनले गत सिजन ससेक्सबाट काउन्टी खेलेका थिए । हमादले भने घरेलु क्रिकेटमा उत्कृष्ट प्रदर्शन गर्दै आइरहेका छन् ।

यसअघि ललितपुरले श्रीलंकाका उपुल थरंगालाई अनुबन्ध गरिसकेको छ।

ईपीएल चैत १ गतेदेखि १५ गतेसम्म टियु क्रिकेट मैदानमा हुनेछ ।

ललितपुर राष्ट्रिय टिमका कप्तान समेत रहेका ज्ञानेन्द्र मल्लको कप्तानीमा मैदान उत्रने छ । टिमको मुख्य प्रशिक्षकमा राजु बस्न्यात रहेका छन् ।

गत सिजन ललितपुरले फाइनलमा भैरहवा ग्ल्याडीयटर्सलाई हराएर उपाधि जितेको थियो ।