नेपाल ओमानसँग पराजित

काठमाडौं । आईसीसी विश्वकप क्रिकेट लिग–२ अन्तर्गत त्रिकोणात्मक सिरिजको पहिलो खेलमा नेपाल ओमानसँग पराजित भएको छ ।

त्रिवि क्रिकेट मैदानमा बुधबार भएको खेलमा नेपाल ओमानसँग १८ रनले पराजित भएको हो । 

ओमानले दिएको १ सय ९८ रनको लक्ष्यसहित जवाफी ब्याटिङ गरेको नेपाल ४६ ओभर ५ बलमा अलआउट हुँदै १ सय ७९ रनमा समेटियो ।

शरद भेषवाकरले ५५ रनको अर्धशतकीय इनिङ्स खेलेपनि नेपालले जित निकाल्न सकेन । ९६ बलमा अर्धशतक बनाएका शरदले १ सय ८ बलमा पाँच चौका प्रहार गरे ।

एकदिवसीय अन्तर्राष्ट्रिय क्रिकेटमा अर्धशतक बनाउने शरद छैटौं खेलाडी हुन् ।  यस्तै शरद घरेलु मैदानमा एकदिवसीय अन्तर्राष्ट्रियमा अर्धशतक पुरा गर्ने पहिलो खेलाडी बने ।

दिपेन्द्र सिंह ऐरीले ३६ रन जोड्दा सन्दीप लामिछानेले २८ रन बनाए । यस्तै विनोद भण्डारीले २६ रन बनाए ।

कप्तान ज्ञानेन्द्र मल्ल १ रनमा आउट हुँदा पारस खड्का ३ रनमा पेभेलियन फर्किए । सुशन भारी ८ रनमा आउट हुँदा अविनाश बोहोरा ८ रनमा अविजित रहे । आरिफ शेख ६ रनमा आउट हुँदा रोहित कुमार पौडेल र करण केसी सुन्य रनमा आउट भए ।

ओमानका जिशन मक्सुदले ३ विकेट लिए । यस्तै बिलाल खान र कलिमउल्लाले समान २/२ विकेट लिए  ।

खराब सुरुवात गरेको नेपालले पहिलो विकेटको रुपमा कप्तान ज्ञानेन्द्र सर्ट मिड अनमा कलिमउल्लाको बलमा मोहमद नदीमको हातबाट क्याच भए ।

दोस्रो विकेटको रुपमा पारसको एज लागेको बल विकेटकिपर सुरज कुमारले सजिलै क्याच लिए ।

उपकप्तान दिपेन्द्रलाई एलबीडब्लुको धरापमा परे । आरिफ शेखलाई जसन मक्सुदले कट एण्ड बोल्ड गरे गर्दा लगत्तै रोहितलाई स्लिपमा क्याच गराए ।

सर्ट कभरमा सजिलै क्याच भएका विनोद छैठौं विकेटको रुपमा सिकार बने ।

करणलाई कलिमउल्लाले मिड विकेटको क्षेत्रमा नसिम खुशीको हातबाट आउट भए ।

सर्वाधिक रन बनाएका शरद अकिबको बलमा बोल्ड हुँदा सन्दीप मक्सुदको बलमा खवरको हातबाट आउट भए ।

अन्तिम विकेटको रुपमा सुशन बिलाल खानको बलमा विकेटकिपर सुरजको हातबाट क्याच आउट भए ।

यस अघि टस हारेर पहिले ब्याटिङ गरेको ओमानले ५० ओभरमा ९ विकेट गुमाएर १ सय ९७ रन बनाएको थियो ।

ओमानका लागि मोहमद नदीमले अविजित रहदै ६९ अर्धशतकीय इनिङ्स खेले । उनले ९६ बलमा ५ चौका र २ छक्का प्रहार गरे ।

सन्दीप गौदले ३३ रन जोड्दा कप्तान जसन मसुदले २० रन बनाए । त्यस्तै ओमानका अकिब अयासले १६ रन बनाउनु बाहेक अन्य खेलाडीले दोहोरो अंक छुन सकेनन् ।

नेपालका करण केसीले ४ विकेट लिए । डेब्यु खेलाडी सुशन भारीले ३ विकेट हात पारे । यस्तै दिपेन्द्र सिंह ऐरीले १ विकेट हात पारे । सन्दीप लामिछाने भने विकेट विहीन बनेका छन् ।

पहिलो ओभरको अन्तिम बलमा करणले ओमानका जितेन्दर सिंहलाई ४ रनमा बोल्ड गरे । यस्तै दोस्रो विकेटको रुपमा करणले सातौँ ओभरको चौथो बलमा खवर अलीलाई ५ रनमा किपर विनोद भण्डारीको हातबाट क्याच गराए ।

१३ औं ओभरमा छिटो रन लिने क्रममा दिपेन्द्रले अकिब अयासलाई रन आउट गरे । यस्तै डेब्यु खेलाडी सुशनले आफ्नो पहिलो ओभरमा जसन मसुद र सुरार कुमारलाई आउट गर्दै ओमानको इनिङ धरापमा पारेका थिए ।

सुशनले मसुदलाई एलबीडब्लु र सुरजलाई कप्तान ज्ञानेन्द्र मल्लको हातबाट क्याच गराए ।

तर, पाँचौं विकेटका लागि महोमद नदीम र सन्दीप गौडले ६० रनको अर्धशतकीय रनको साझेदारी गर्दै ओमानको इनिङ उकासेका थिए ।

उत्कृष्ट ब्याटिङ गरिरहेका सन्दीपलाई सुशनले विनोदको हातबाट स्टम्पिङ गराएर उनीहरुको साझेदारी तोडेका थिए । यस्तै बादल सिंहलाई ४ रनमा दिपेन्द्रले रोहित पौडेलको हातबाट सर्ट कभरमा क्याच गराए ।

आठौं विकेटको रुपमा नशिम खुशीलाई करणले शरद भेषवाकरको हातबाट सर्ट थर्ड म्यानमा आउट पारे । सोहि ओभरमा करणले कलिमउल्लालाई विनोद हातबाट आउट गरे ।

यससँगै विश्वकप छनोट अन्तर्गत रहेको लिग-२ मा नेपालले हारबाट सुरुवात गरेको छ । यस्तै नेपालले घरेलु मैदानको पहिलो ऐतिहासिक एकदिवसीय अन्तर्राष्ट्रियमा हार व्यहोरेको छ ।

एकदिवसीय अन्तर्राष्ट्रिय मान्यता पाएको २ वर्षपछि नेपालले घरेलु भूमिमा एकदिवसीय खेल खेलेको हो । सन् २०१८ मा भएको विश्वकप छनोटमा नेपालले पहिलो पटक एकदिवसीय अन्तराष्ट्रिय पाएको थियो ।

एकदिवसीय अन्तराष्ट्रिय मान्यता पाएपछि नेपालले यस अघि विदेशी भूमिमा ६ खेल खेलेको थियो ।

लिग अन्तर्गत अब नेपालले अमेरिकासँग शनिबार खेल्नेछ ।

नेपाललाई हराएसँगै ओमान लिगको दोस्रो स्थानमा उक्लिएको छ । ओमानले ५ खेलमा १० अंक जोडेको छ ।

अमेरिका ६ खेलमा १२ अंकसहित शीर्ष स्थानमा रहेको छ । अमेरिकाले बिहिबार ओमानसँग खेल्नेछ ।