व्रोड भिजन र शारदा सेमिफाइनलमा

धनगढी । व्रोड भिजन र शारदा मावि पहिलो अन्तर विद्यालय स्तरीय महिला क्रिकेट प्रतियोगिताको सेमिफाइनलमा प्रवेश गरेका छन् ।

सोमबार भएको पहिलो खेलमा व्रोड भिजनलाई लिटिल फ्लावरले ६ विकेटले पराजित गर्यो । व्रोड भिजनले पहिले व्याटिङ गर्दै ६२ रन बनायो । जवाफमा लिटिल फ्लावरले ४ विकेट क्षतिमा लक्ष्य पुरा गर्यो ।

हारका वाजवुत पनि यसअघिका दुई खेल जितेको व्रोड भिजन समूह 'ए' बाट सेमिफाइनलमा प्रवेश गरेको छ । लिटिल फ्लावर भने प्रतियोगिताबाट बाहिरिएको छ ।

दोस्रो खेलमा त्रिभुवन माविले एरिष्टो स्कुललाई २० रनले हरायो । त्रिभुवनले पहिलो व्याटिङ गर्दै १०२ रन बनायो । जवाफमा एरिष्टोले ८२ रन मात्रै बनाउन सक्यो । जितसँगै समूह 'ए' बाट त्रिभुवन मावि अन्तिम चारमा पुगेको छ । एरिष्टो प्रतियोगिताबाट बाहिरिएको छ ।

सोमबार भएको तेस्रो खेलमा क्यास्पियन एकेडेमीलाई शारदा माविले ६ विकेटले हरायो । पहिलो व्याटिङ गरेको क्यास्पियन २५ रनमा अलआउट भयो । प्जवाफमा शारदाले ४ विकेटको क्षतिमा लक्ष्य पुरा गर्यो ।

जितसँगै समूह 'वी' बाट शारदा सेमिफाइनलमा प्रवेश गरेको छ । क्यास्पियन भने प्रतियोगिताबाट बाहिरिएको छ ।

कैलाली जिल्ला खेलकुद विकास समितिको आयोजना तथा कैलाली जिल्ला क्रिकेट क्लबको व्यवस्थापनमा जारी प्रतियोगितामा मंगलबार लिग चरणको अन्तिम एक खेल हुनेछ । लिग चरणको अन्तिम खेलमा राष्ट्रिय तुल्सीराम मावि र धनगढी नमुना मावि प्रतिस्पर्धा गर्ने छन् ।