काठमाडौं । चौथो संस्करणको एभरेष्ट प्रिमियर लिग (ईपीएल) टी-ट्वान्टी क्रिकेट निकै माथिल्लो स्तरको हुने देखिएको छ ।
चैत १ गतेबाट सुरु हुने ईपीएलका लागि सहभागी टिमले विश्व क्रिकेटका हस्ती खेलाडीलाई अनुबन्ध गर्न थालिसकेको छ ।
आयोजकले यस संस्करणमा दक्षिण अफ्रिकाका हसिम अमला, वेष्ट इन्डिजका ड्वेन स्मिथ, इंग्ल्यान्डका लायम प्लङ्केट, अफगानिस्तानका मोहमद सहजाद, श्रीलंकाका उपल थरंगा जस्ता खेलाडीको खेल कौशल देख्न सकिने जनाएको छ ।
यस्तोमा भैरहवा ग्लाडियटर्सले ईपीएलको लागि वेष्ट इन्डिजका पूर्व खेलाडी ड्वेन स्मिथलाई अनुबन्ध गरिसकेको छ ।
ओपनिङ ब्याटिङ गर्न रुचाउने स्मिथले भैरहवाबाट यस सिजन ओपनिङ गर्दै मुख्य ब्याट्सम्यानको भूमिका निर्वाह गर्ने पक्का छ ।
को हुन् स्मिथ ?
ड्वेन स्मिथ एक वेष्ट इण्डिजका पार्ट टाईम अलराउण्डर हुन् । जसले सबै फर्म्याटको अन्तराष्ट्रिय क्रिकेट खेलेका छन् । उनी आक्रामक र शक्तिशाली ब्याट्सम्यानको रुपमा परिचित छन् ।
स्मिथले विश्वका प्रख्यात सबै टी-ट्वान्टी प्रतियोगिता खेलिसकेका छन् । भारतको आईपीएल हुँदै अष्ट्रेलियाको बिग बास देखि क्यानडाको ग्लोबल टी ट्वान्टी सम्म ।
स्मिथले सन् २००४ मा दक्षिण अफ्रिकाविरुद्ध टेष्ट डेब्यु गरेका थिए । सिरिज अन्तर्गतको तेस्रो खेलमा डेब्यु गर्दै उनले शतक प्रहार गरेका थिए । पहिलो इनिङ्समा २० रन बनाएका उनले दोस्रो इनिङमा १ सय ५ रनको अविजित इनिङ्स खेल्दै खेल बराबरी गरेका थिए ।
एकदिवसीयतर्फ भने स्मिथले खासै सम्झन लायक प्रदर्शन गर्न सकेनन् । एकदिवसीयमा १ सय ५ खेलमा उनले ८ अर्धशतक सहित १ हजार ५ सय ६० रन बनाउँदा ६१ विकेट लिएका छन् ।
यस्तै ३३ टी-ट्वान्टी अन्तराष्ट्रिय खेलमा ५ सय ८२ रन बनाएका छन् ।
अन्य टी-ट्वान्टीमा भने उनले ३ सय २७ इनिङ्समा ७ हजार ८ सय ७० रन बनाएका छन् । जसमा ५ शतक र ४७ अर्धशतक रहेको छ । टी-ट्वान्टी बलिङमा उनले १ सय ७४ इनिङ्समा १ सय १० विकेट लिएका छन् ।
स्मिथ वेष्ट इण्डिजबाट सन् २००७ र २०१५ को एकदिवसीय विश्वकपमा समावेश थिए ।
टी-ट्वान्टी विश्वकपमा भने उनले आफ्नो देशबाट ३ संस्करण खेलेका छन् । सन् २००७, २०१२ र २०१४ को टी-ट्वान्टी विश्वकपमा सहभागिता जनाएका थिए । श्रीलंकामा भएको सन् २०१२ को विश्वकप जसमा वेष्ट इण्डिज विश्व विजेता बनेको थियो । उक्त विश्वकपमा स्मिथले ५ खेल खेल्दै १ सय २५ रन बनाएका थिए ।
हङकङमा हुने टी-ट्वान्टी ब्लिट्जमा स्मिथले सन् २०१७ को संस्करणमा ३१ बलमा शतक प्रहार गर्दै कीर्तिमान बनाएका थिए । अन्तराष्ट्रिय क्रिकेटबाट सन्यास लिएको अर्को हप्ता उनले आक्रामक ब्याटिङ गरेका थिए ।
त्यसैले स्मिथ टी-ट्वान्टी क्रिकेटमा निकै चर्चित खेलाडी हुन् । तर, पछिल्लो समय उनले खासै प्रभाब जमाउन सकेका छैनन् । उनी नेपालमा पहिलो पटक खेल्न आउने भएपछि नेपाली समर्थक भने हर्षित छन् ।
ईपीएलको फाइनलमा चुक्दै आएको भैरहवा यस पटक स्मिथको ब्याटले एक कदम अघि बढ्न चाहान्छ र स्मिथ त्यसका लागि योग्य खेलाडी पनि हुन् ।
