भारतीय भलिबल खेलाडी भन्छन् – दर्शक कम भए

काठमाडौं । भारतीय राष्ट्रिय भलिबल टिमका स्पाइकर अमित कुमार नेपालमा छन् । काठमाडौंमा सञ्चालन भईरहेको आरबीबी एनभीए नेश्नल क्लब च्याम्पियनसिप खेल्न उनी नेपाल आएका हुन् ।

उनी गत मंसिरमा समेत नेपाल आएका थिए । १३ औं दक्षिण एसियाली खेलकुद साग खेल्न । भारतीय टिमले स्वर्णनै जित्यो । नेपाल समूह चरणमै भारतसंगै हारेको थियो ।

सोही टिमका महत्वपूर्ण सदस्य अमित हेप्प नेपालको टिमबाट क्लब च्याम्पियनसिप खेलिरहेका छन् । दक्षिण एसियाली भलिबलमा भारतको दबदबा छ । अनि भारत सधै नेपाली खेलाडीमाथि हाबी हुँदै आएका छन् ।

एनभीएको क्लब च्याम्पियनसिपमा भारतीय खेलाडीसंग नेपाली भलिबल खेलाडीले प्रतिस्पर्धा गर्न पाएका छन् । प्रतिस्पर्धासंगै अनुभव साट्न पाएका छन् ।

क्लब च्याम्पियनसिप खेलिरहेका अमित नेपालका खेलाडीमा उचाई र खेल्ने रणनीतिको कमी भएको मान्छन् ।

‘भलिबलमा उचाईको धेरै आवश्यकता हुन्छ । नेपाली खेलाडीमा उचाईको धेरै कमी देखिन्छ । र रणनीतिको पनि कमी देखिन्छ ।’ उनी भन्छन् ।

एनभीए क्लब च्याम्पियनसिपमा हेल्प नेपाल स्पोटर््स क्लबबाट खेल्न उनी सहित अन्य दुई भारतीय खेलाडी नेपालमा छन् ।

उनी सम्मिलित टिम हेल्प नेपालले क्वाटरफाइनलमा तीन भारतीय खेलाडी सम्मिलित टिम बुलबुले रारा क्लबलाई ३–० को सोझो सेटमा पराजित गर्दै सेमिफाइनल प्रवेश गरेको छ ।

त्यसअघि हेल्प नेपालले बुद्धटोल युवा क्लबलाई पनि सोझो सेटमा हराएको थियो ।

‘उनीहरुको टिममा पनि भारतका तीन खेलाडी थिए । हराउँदा धेरै खुशी लागेको छ । हाम्रो टिमले धेरै राम्रो खेलेको थियो ।’ उनी थप्छन् ।

अमितले नेपाली प्रतियोगितामा खेल्दा धेरै खुशी लागेको र अरु टिमको तुलनामा हेल्प नेपाल बलियो भएको बताए ।

‘नेपालको घरेलु प्रतियोगितामा मेरो पहिलो सहभागीता हो । यसअघि सागमा आएको थिए । धेरै राम्रो लागेको छ ।’ उनले थपे, ‘अरु टिमको तुलनामा हाम्रो टिम धेरै राम्रो छ ।’

तर उनले भारतको तुलनामा नेपालमा कम प्रशिक्षण गरेको बताए ।

‘भारतमा लामो समय प्रशिक्षण हुन्छ । तर यहाँ एक हप्ता मात्र प्रशिक्षण भयो ।’ उनले थपे ।

अमितले प्रतियोगितामा नेपालका घरेलु खेलाडी धेरै बलियो भएको बताए । साथै आफु नेपालमा जित्नका लागि आएको र लक्ष्य उपाधि नै रहेको बताए ।
उनले पहिलेको तुलनामा अहिले नेपालको टिम धेरै राम्रो भएको उल्लेख गरे ।

यस्तै भारतका अर्का खेलाडी विकास कुमारले प्रतियोगितामा दर्शक धेरै भए खेल्नकालागि ऊर्जा मिल्ने बताउँछन् ।

उनी भन्छन्, ‘पहिलाको तुलनामा प्रतियोगितामा दर्शकको कमी छ । सायद फाइनलमा आउनेछन् । दर्शकको भिड भए खेल्न रमाइलो हुन्छ र खेलाडीलाई ऊर्जा मिल्छ । साथै दर्शकको साथले खेल्नका लागि जोड लगाउन प्रोत्साहन मिल्छ ।’

विकासले यसअघि पनि आरबीबी च्याम्पियनसिपमा हेल्प नेपालबाट खेलिसकेका छन् ।

उनले नेपालमा भलिबल खेलेको अनुभव राम्रो भएको सुनाए ।

‘अनुभव राम्रो छ । ३–४ वर्ष पहिला पनि आएको थिए । हेल्प नेपालबाट नै खेलेको थिए । त्यो समय उपाधि जितेका थियौ ।’ उनले भने ।

विकासले उपाधिका लागि आफुले सतप्रतिशत दिन तयार रहेको बताए ।

‘कुनै टिमको पुरा खेल हेरेका छैनौ । तर आर्मी, पुलिस राम्रो छ भन्छन् । सय प्रतिशत दिन्छौं । खेलमा भाग्यको पनि आवश्यकता पर्छ ।’ उनी थप्छन् ।

क्लब च्याम्पियनसिपको पुरुष स्पर्धाको फाईनलमा शुक्रबार दिउँसो हेल्प नेपालले विभागीय टिम एपीएफसंग प्रतिस्पर्धा गर्दैछ ।