५० ओभर टिक्नै धौ धौ !

काठमाडौँ । मनमोहन मेमोरियल (एमएम) कप एकदिवसीय राष्ट्रिय क्रिकेट प्रतियोगिताको तेस्रो संस्करण शनिबार सकिएको छ । एक दिवसीय ढाँचामा खेलाइएको प्रतियोगितामा कुल १५ खेल भए ।

तर १५ मध्य कुनै पनि खेलमा निर्धारित ५० ओभर खेलाडी टिक्क सकेनन् ।

पछिल्लो तीन बर्षदेखि नेपाली क्रिकेटर टी–ट्वान्टी खेल्न ब्यस्त छन् । एमएम कपको नतिजाले नेपाली क्रिकेटर लामो ढाँचाको क्रिकेट खेल्न नसकेको प्रष्ट देखाउँछ ।

राष्ट्रिय टिमबाट खेल्दै आएका खेलाडी सहित प्रादेशिक टिमदेखि विभागीय टिम सम्मका खेलाडीले प्रतियोगिता अवधिभर पुरै ओभर क्रिजमा टिक्न सकेनन् ।

न उल्लेख्य रन बन्यो, न खेलाडी मैदानमा टिक्न सके ।

अन्तराष्ट्रिय स्तरमा एक दिवसीय मान्यता पाएको नेपालले घरेलु प्रतियोगितामा निर्धारित ओभर खेल्न नसक्नु लज्जाको विषय हो ।

नेपाल क्रिकेट संघ क्यान अन्तराष्ट्रिय क्रिकेट काउन्सिल आईसीसीको निलम्बनमा रहँदा घरेलु क्रिकेट प्रतियोगिता निकै कम आयोजना भए । तर जति भए, अधिकांश ट्वान्टी ओभरको फ्रेन्चाईज भए ।

यस्तो अवस्थामा एक दिवसीय प्रतियोगिता आयोजना हुनु आफैमा तारिफ योग्य छ । जसले जसोतसो एक दिवसीय क्रिकेट खेल्न खेलाडीलाई अवसर दिन्छ ।

नेपालमा हाल एक दिवसीय प्रतियोगिता निकै सिमित छ । लामो ढाँचाको क्रिकेट त छैन भन्दा हुन्छ ।

नेपालमा तीन ठुला टी–ट्वान्टी फ्रेन्चाइज लिग नियमित आयोजना हुदै आएका छन् । तर एकदिवसीय प्रतियोगिता भने प्रधानमन्त्री कप र एमएम कप मात्र हुने गरेको छ ।

अन्तराष्ट्रिय स्तरमा एक दिवसीय मान्यता पाएको पनि दुई वर्ष पुग्न लागेको छ ।

यसबीचमा न प्रतियोगिता स्तरिय बन्न सकेका छन्, न खेलनै ।

एमएम कपमा नेपाल पुलिस क्लबले कर्णाली प्रदेशविरुद्ध बनाएको ३ सय ४६ रन सर्वाधिक उच्च स्कोर रह्यो । यद्दपी पुलिस क्लबले निर्धारित ५० ओभर खेल्न सकेन ।

खराब मौषमका कारण ४७ ओभरमा झारिएको खेलमा मात्र मलेसियाले पुरा ओभर खेल्यो । अन्य कुनै पनि इनिङ्समा खेलाडी पुरा ओभर टिक्न सकेनन् ।

मलेसियाले सुदूरपश्चिमविरुद्ध बनाएको ४९ रन सर्वाधिक कम स्कोर रहयो । स्लो पिचमा सुदूरपश्चिमका स्पिनर द्वय शेर मल्ल र बिनोद लामाले मलेसियाको ९ विकेट लिएका थिए ।

तर मलेसियाले समुह चरणको आफ्नो दोस्रो खेलमा सानदार विजयी हात पार्यो । उसले गण्डकी प्रदेशलाई १ सय ९२ रनले पराजित गर्यो ।

पहिलो खेलमा पिचको अवस्था नबुझेको मलेसियाले दोस्रो खेलमा पिच अनुसार उत्कृष्ट प्रदर्शन गरेको थियो । तर नेपाली खेलाडी भने पिच अनुसारको खेल देखाउन चुक्दै आएका छन् । जसको प्रभाब अन्तराष्ट्रिय स्तरका खेलमा समेत देखिने गरेको छ ।

आर्मीका कुशल मल्लले बाहेक अन्य खेलाडीले प्रतियोगितामा शतक बनाउन सकेनन् । उनले एपीएफविरुद्ध ६३ बलमा १ सय ११ रन बनाएका थिए । उनै मल्ल प्रतियोगिताको ४ खेलमा १ सय ९६ रन बनाउँदै उत्कृष्ट ब्याट्सम्यान बने ।

किन पुरा ओभर टिक्न सकेनन् खेलाडी ?

स्लो विकेट र हरेक टिममा एक स्तरीय स्पिनर रहेको कारण ब्याट्सम्यान टिक्न नसकेको क्रिकेट टिमका पूर्व कप्तान तथा हाल यू–१९ टिमका प्रशिक्षक बिनोद दास बताउँछन् ।

’विकेट त्यति सजिलो देखिएको थिएन । स्पिनरले बल फालेको देख्दा त टिक्नै मुस्किल देखिन्थ्यो ।’ बिनोद भन्छन्, ’एक दिवसीय प्रतियोगिता नियमित पनि छैन, खेलाडी टी–ट्वान्टीमा ब्यस्त हुँदा एक दिवसीय खेलमा घुलमिल हुन समय पनि लाग्छ । मुख्य कुरा कन्डिसन नै हो ।’

प्रतियोगितामा सर्वाधिक विकेट लिने खेलाडीको सुचिमा स्पिनर बाहेक अन्य खेलाडीको नाम भेट्टाउन मुस्किल छ । आर्मीका सुशन भारीले ४ खेलमा १५ विकेट लिंदै प्रतियोगिताको सर्वोकृष्ट खेलाडी चुनिएका थिए ।

यस्तै, सर्वाधिक विकेट लिने सूचिमा शीर्ष पाँचमा सबै स्पिनर मात्र रहेका छन् ।

पुर्व कप्तान तथा स्टार ब्याट्सम्यान पारस खड्का समेत बिनोद दासको कुरामा सहमत देखिन्छन् ।

’आँकडाले मात्र सबै कुरा देखाउँदैन । आयोजकले जसोतसो मैदान तयार गर्नु भएको थियो । वास्तवमा त्रिवि मैदानको पिच समेत अन्तराष्ट्रिय स्तरमा मापन हुँदैन ।’ उनले भने ।

तर खेलाडीले भने आँकडालाई हेरेर आफ्नो खेल बिकास गर्नु पर्ने आवश्यकता रहेको पारस बताउँछन् ।

पारस जसोतसो निर्माण भएको पिचमा राज्यले थप लगानी गर्दै सातै प्रदेशमा स्तरीय मैदान बनाउन सुझाव दिन्छन् ।

’नेपालभर मैदान र पिचमा लगानी गर्नु पर्ने देखिएको छ ।’ उनी भन्छन्, ’सात वटै प्रदेशमा स्तरीय पिच निर्माण गरे ५० ओभर मात्र नभएर दुई दिने क्रिकेट खेलाउनु योग्य हुनेछ ।’