सन्दीपको टिम मेलबर्नको दशौँ जित
एजेन्सी । नेपाली लेग स्पिनर सन्दीप लामिछाने रहेको मेलबर्न स्टार्सले बिग बास लिग (बीबीएल) क्रिकेटमा दशौँ जित निकालेको छ ।
मेलबर्नमा शनिबार भएको खेलमा पर्थ स्कोर्चसलाई १० रनले हराउँदै मेलबर्नले लिगमा दशौँ जित हात पारेको हो ।
मेलबर्नले दिएको १ सय ४२ रनको लक्ष्यसहित जवाफी ब्याटिङ गरेको पर्थले २० ओभरमा ९ विकेट गुमाएर १ सय ३१ रन मात्र बनाउन सक्यो ।
पर्थका लागि क्यामरुन बेन्क्राफ्टले सर्वाधिक ३२ रन जोड्दा कुर्टिस पिटर्सनले २० रन बनाए । मेलबर्नका निक म्याडीनसनले ३ विकेट लिए ।
सन्दीपले ४ ओभरमा २९ रन खर्चिएर १ विकेट लिए । यससँगै सन्दीपले यस सिजन १० खेलमा १२ विकेट हात पार्न सफल भएका छन् ।
यस अघि टस हारेर पहिले ब्याटिङ गरेको मेलबर्नले २० ओभरमा ६ विकेट गुमाएर १ सय ४१ रन बनाएको थियो ।
मेलबर्नका लागि हिल्टन क्याटराइटले अविजित ५८ रनको अर्धशतकीय इनिङ्स खेले । यस्तै कप्तान ग्लेन म्याक्सवेलले २५ तथा निक लार्किनले २४ रन बनाए ।
जितसँगै मेलबर्नले ११ खेलमा १० जितसहित २० अंक जोडेको छ । मेलबर्न शीर्ष स्थानमा कायम रहेको छ ।
पर्थ ११ खेलमा १० अंक जोडेर लिगको चौंथो स्थानमा रहेको छ ।
