काठमाडौं । सरकारले देशभरका स्थानीय तहमा खेलकुद पुर्वाधार निर्माण गर्ने उद्धेश्यले सुरु गरेको ‘एक स्थानीय तहमा एक खेलग्राम’ बनाउने योजनामा १ सय ६० वटा स्थानीय तहले प्रस्ताव पेश गरेका छन् ।
स्थानीय तहमा दीर्घकालीन महत्वत्वका एक एक खेलकुद पूर्वाधार निर्माण गर्ने योजना अन्तर्गत १ सय ६० वटा स्थानीय तहले युवा तथा खेलकुद मन्त्रालयमा प्रस्ताव पेश गरेका हुन् ।
आवेदनका लागि खुल्ला गरिएको समयमा सातवटै प्रदेशका १ सय ६० स्थानीय तहले पुर्वाधार निर्माणको प्रस्ताव पेश गरेको मन्त्रालयका खेल पुर्वाधार विकास शाखा प्रमुख राजेश सिग्देलले खेलपाटीलाई जानकारी दिए ।
‘सुचना माग भए अनुसार स्थानीय तहबाट कार्यविधिमा तोकिए अनुसार प्रस्ताव पेश भएका छन् । सात वटा प्रदेशबाट १ सय ६० स्थानीय तहले खेलग्राम निर्माणका लागि प्रस्ताव मन्त्रालयमा पेश गरेका छन् ।’ सिग्देलले भने ।
मन्त्रालयले प्रस्ताव पेश गर्न स्थानीय तहलाई भदौ ४ गतेदेखि असोज ४ गतेसम्मको समय उपलब्ध गराएको थियो ।
कतिपय स्थानीय तहले जानकारी नपाएको भन्दै अझैपनि मन्त्रालयमा खेलग्रामका लागि प्रस्ताव पेश गरिरहेका छन् । ती प्रस्तावलाई अर्को आर्थिक बर्षमा समावेश गर्ने मन्त्रालयको तयारी छ ।
सरकारले अघिल्लो आर्थिक बर्षमा ‘एक स्थानीय तहमा एक खेलग्राम’ निर्माण गर्ने नीति तथा कार्यक्रम प्रस्तुत गरेको थियो । सोही अनुसार स्थानीय तहमा खेलकुद पूर्वाधार निर्माण सम्बन्धी कार्यविधि स्वीकृत समेत भईसकेको छ ।
प्रस्ताव गरिएको पूर्वाधारमा सरकारले ७० प्रतिशत र स्थानीय तहले ३० प्रतिशत लगानी व्यवस्थापन गर्ने मोडालिटी सहित सरकारले खेलग्रामको अवधारणा अघि सारेको हो ।
जस अनुसार बहुउद्धेश्य कर्भडहल सहितको खेल मैदान निर्माण गर्न स्थानीय तहले ३० प्रतिशत बजेटको व्यवस्थापन गरेमा सरकारले ७० प्रतिशत रकम उपलब्ध गराउने छ । तर स्थानीय तहले जग्गा सहितको पूर्वाधारको डीपीआर मन्त्रालयमा पेश गर्नुपर्नेछ । मन्त्रालयले योजना छनोट गरेर आवश्यक रकम स्थानीय तहको खातमा हालिदिनेछ ।
सरकारले चालू आर्थिक बर्षका लागि सो कार्यक्रममा ४० करोड रुपैयाँ बजेट विनियोजन गरेको छ । नतिजा हेरेर कार्यक्रमको रकम थप गर्न सक्ने अर्थ मन्त्रालयले जनाएको छ ।
खेलकुद मन्त्रालयका अनुसार प्रदेश १ बाट २२ वटा स्थानीय तहले खेलग्राम निर्माणको प्रस्ताव गरेका छन् ।
यस्तै, प्रदेश २ बाट १५, प्रदेश ३ बाट १२, प्रदेश ४ बाट २९, प्रदेश ५ बाट ३१, प्रदेश ६ बाट २७ र प्रदेश ७ बाट २४ वटा खेलग्राम निर्माणको प्रस्ताव मन्त्रालयमा आएका छन् ।
स्थानीय तहले लाखदेखि ४२ करोडसम्मको खेलग्रामको प्रस्ताव मन्त्रालयमा पेश गरेका छ । सिरहाको गोलबजारमा रहेको ५९ विगाहा जग्गामा खेलग्राम बनाउने सम्मको योजना स्थानीय तहले मन्त्रालयमा पेश गरेका छन् ।
मन्त्रालयले चाँडै प्रस्तावहरुको छनोट गरेर कार्यविधि अनुसार स्थानीय तहसंग सम्झौता गर्ने तयारी गरेको छ । बहुबार्षिक योजना अनुसार पूर्वाधार निर्माणको रकम मन्त्रालयले स्थानीय तहलाई प्रदान गर्नेछ ।
खेलकुद मन्त्रालयका सह–सचिव अणप्रसाद न्यौपानेले पहिलो बर्षमै १ सय २० बढी प्रस्ताव आउनुलाई सकारात्मक रुपमा मन्त्रालयले लिएको बताउँछन् ।
‘संख्यात्मक रुपमा कमजोर प्रस्ताव हैन । राम्रो पूर्वाधार बनाएर सरकारले नमूनाको रुपमा कार्यक्रमलाई प्रस्तुत गरेमा अरु स्थानीय तहसमेत कार्यक्रममा सहभागी हुनेछन् ।’ उनले खेलपाटीसंग भने ।
सरकारले हरेक स्थानीय तहमा खेलकुदको पूर्वाधार निर्माण गर्ने उद्धेश्यले एक खेलग्रामको योजना अघि बढाएको हो ।
स्थानीय तहमा पूर्वाधार निर्माणको काम अघि बढ्दा देशैभर खेलकुदका गतिविधि बढ्ने र स्थानीय तहमा मापदण्ड पुगेका खेलकुद पूर्वाधार बन्ने सह सचिव न्यौपानले बताउँछन् ।
सरकारले ७ सय ५३ वटै स्थानीय तह कार्यक्रममा जोडिन सक्ने बताएको छ ।
