काठमाडौं । राष्ट्रिय फुटबल टिमका पुर्व फरवार्ड सन्तोष शाहुखलले आफ्नो आवश्यकता महशुश भए देशमा फर्कन तयार रहेको बताएका छन् ।
बुधबार घरेलु लिग फुटबलमा एक सय गोलको कीर्तिमान रचेका सन्तोषले राष्ट्रिय टिममा आह्वान भएको खण्डमा देशमा फर्कन तयार रहेको बताएका छन् ।
सन्तोष घरेलु लिग फुटबलमा सय गोल पुरा गर्ने पहिलो खेलाडी भएका छन् । उनले काठमाडौंमा सञ्चालित सहिद स्मारक ए डिभिजन लिगमा पुलिसविरुद्व गोल गर्दै फुटबल करियरको एक सय गोल पुरा गरेका हुन् ।
उनकै दुई गोलको सहयोगमा च्यासल युथ क्लबले बुधबार पुलिससंग २–२ गोलको बराबरी खेल्दै अंक बाँड्न सफल रहेको थियो ।
'एक समय ५० गोल पुरा गर्दा समेत टिममा नबोलाउँदा दुख लाग्थ्यो । अब फेरी बोलायो भने देशमा फर्कन तयार छु् ।' सन्तोषले खेलपछि भने ।
सन्तोष पछिल्लो समय जापानमा बस्दै आएका छन् । जापानमा फुटबल गतिविधिमा सक्रिय उनी ए डिभिजन लिग खेल्न नेपाल आएका हुन् ।
उनले आफुलाई राष्ट्रिय टिमबाट खेल्न बोलाएको खण्डमा देश फर्कन तयार रहेको अभिव्यक्ति दिएका हुन् ।
उनले सय गोल भन्दा पनि च्यासललाई जित दिलाउन आफ्नो ध्यानमा रहेको बताउँदै घरेलु लिगमा सय गोलको कोशेढुङ्गा पार गर्दा सामान्य अनुभव भएको बताए ।
'सय गोल भन्दा पनि च्यासललाई जिताउनु थियो । टिमलाई माथि पुर्याउन ध्यान छ ।' उनले थपे, 'खुसीयाली मनाउने कुनै योजना थिएन । सामान्य अनुभव प्राप्त गरे ।'
उनले लिग निरन्तर भएको खण्डमा अन्य खेलाडीले आफ्नो कीर्तिमान भंग गर्न सक्ने बताए ।
'सय गोल बन्दा पुग्दो रहेछ भन्ने लाग्यो ।' सन्तोषले भने, 'सुरेन्द्र तामाङले ५० गोल पुरा गर्दा कसरी पुर्याउने भन्ने तिर लागे । त्यसको खुसी मनाए । तर अहिले त्यस्तो केही छैन ।'
बिस २०६० सालमा थ्री स्टारबाट लिगमा डेब्यु गरेका सन्तोषले सर्वाधिक गोल पनि थ्री स्टार क्लबबाटै गरेका छन् । उनले थ्री स्टारबाट ६ सिजन खेलेका छन् । जसमा उनले ५२ गोल गरेका छन् । त्यसबाहेक उनले मनाङ, एपीएफ र च्यासलबाट गोल गरेका छन् ।
सन्तोषले कुन क्लबबाट कति गोल गरे ?
बिस - २०६०
थ्री स्टार - ६ गोल
बिस - २०६१
एपीएफ - ६ गोल
बिस - २०६२
थ्री स्टार -९ गोल
बिस - २०६३
थ्री स्टार - ११ गोल
बिस - २०६६-६७
थ्री स्टार - १९ गोल
बिस - २०६८
मनाङ - १६ गोल
बिस - २०६९
थ्री स्टार - १७ गोल
बिस - २०७०
थ्री स्टार - ९ गोल
बिस - २०७५
च्यासल - ३ गोल
बिस - २०७६
च्यासल - ४ गोल
