काठमाडौं । सहिद स्मारक 'ए' डिभिजन लिग फुटबलमा न्युरोड टिम एनआरटी र जावलाखेल युथ क्लबले बराबरी खेल्दै अंक बाडेका छन् ।
त्रिपुरेश्वरस्थित दशरथ रंगशालामा सोमबार भएको खेलमा एनआरटी र जावलाखेलले गोलरहित बराबरी खेलेका हुन् ।
खेलमा पाएको अवसर गुमाउदा दुबै टोलीले १-१ अंक बाडेका हुन् । दुबै टोलीले गोलको अवसर बनाएपनि गोल गर्न चुकेका थिए ।
खेलको १६ औं मिनेटमा डिबक्स बाहिरबाट जावलाखेलका ड्याडी जुनियरको प्रहार आकाशिएको थियो । यस्तै २६ औं मिनेटमा सुजित बुढाथोकीको फ्रिकिकमा विदेशी खेलाडी डाम्बियाको हेडर पहिलोबार नजिकैबाट बाहिरियो ।
खेलको ३२ औं मिनेटमा एनआरटीका कप्तान प्रकाश बुढाथोकीको फ्रिकिक क्रसबार माथिबाट बाहिरिएको थियो ।
यस्तै खेलको ७२ औं मिनेटमा एनआरटीका कप्तान प्रकाशको फ्रिकिक जावलाखेलका गोलरक्षक टेकेन्द्र थापाले उत्कृष्ट बचाउ गरे । पहिलो हाफको तुलनामा दोस्रो हाफमा जावलाखेलले कम पोस्ट आक्रमण गरेको थियो ।
खेलमा म्यान अफ दि म्याच जावलाखेलका कप्तान कुलदिप कार्की चुनिए ।
यो बराबरीसँगै जावलाखेलले लिगको शीर्ष स्थानमा उक्लने मौका गुमाएको छ । चौंथो स्थानको जावलाखेलले ४ खेलमा ९ अंक जोडेको छ ।
आठौं स्थानको एनआरटीले ४ खेलमा ५ अंक जोडेको छ ।
प्रशिक्षकको भनाई -
जावलाखेलसँग बराबरीमा रोकिएपछि एनआरटीका प्रशिक्षक राजुकाजी शाक्य खुसी देखिएनन् । उनले मिडफिल्डमा एरिक बिष्टको अनुपस्थिति टिममा देखिएको बताए ।
'मिडफिल्डमा एरिक नहुदा गार्हो भयो । नतिजाबाट पनि सन्तुष्ट छैन,' उनले भने ।
जावलाखेलका मुख्य प्रशिक्षक नरेश गिरिले पाएको मौकामा सदुपयोग गर्न नसक्दा बराबरी खेल्नु परेको बताए ।
'तीन अंक आउनु पर्ने तर, पाएको मौका सदुपयोग गर्न नसक्दा गोल भएन,' उनले भने, 'जितेको भए २-३ घन्टाको लागि शीर्ष स्थानमा पुगिन्थ्यो । आज भाग्यको साथ भएन ।'
एनआरटी प्लेईङ सेट -
बिक्रम धिमाल, प्रकाश बुढाथोकी,अजित प्रजापति, अशोक थापा, सरोज तामाङ, तपन कार्की, दर्शन गुरुङ, नविन गुरुङ, जुनियर निकेनगुए, आन्द्रे थेरी, जोर्डन ओवाना
जावलाखेल प्लेईङ सेट -
अरुज सिंह, कुलदिप कार्की,टेकेन्द्र थापा, रुप बहादुर लामा,आडमा डौम्बिया, फोडे फोफाना, ड्याडी जुनिय र, गौतम श्रेष्ठ, सुजित बुढाथोकी,सिमान्त थापा, सुरज ठकुरी
