काठमाडौं । सहिद स्मारक 'ए' डिभिजन लिग फुटबलमा ब्रिगेड ब्वाईज क्लबले हिमालयन शेर्पा क्लबलाई पराजित गरेको छ ।
एन्फा कम्प्लेक्स सातदोबाटोमा मंगलबार भएको खेलमा ब्रिगेडले १० खेलाडीमा सिमित शेर्पालाई १-० गोल अन्तरले पराजित गरेको हो ।
ब्रिगेडको जितमा विजय गुरुङले निर्णायक गोल गरे । खेलको १७ औं मिनेटमा विजयले निर्णायक गोल गरेका हुन् ।
डिबक्स बाहिरबाट उनको कडा प्रहार शेर्पाका खेलाडीलाई लाग्दै गोलमा परिणत भएको थियो ।
खेलमा झिनो अन्तरको हार जित निस्किए पनि दुवै टोलीले गोलको थुप्रै अवसर खेर फालेका थिए ।
खेलको ३५ औं मिनेटमा विजयको अर्को प्रहार शेर्पाका गोलकिपर किशोर गिरिले बचाएका थिए ।
दोस्रो हाफमा शेर्पा निकै आक्रामक देखिएको थियो । ७८ औं मिनेटमा शेर्पाले गोलको सुनौलो अवसर खेर फाल्यो । ब्रिगेडका गोलकिपर विशाल सुनारले खुस्काएको बललाई शेर्पाका त्रिदेभ गुरुङ गोल गर्न चुके ।
८६ औं मिनेटमा विजयको क्रसमा ब्रिगेडका रोशन राना मगर गोल गर्न चुके । ८१ औं मिनेटमा फेरि शेर्पा बराबरी नजिक पुगेर चुक्यो । उसका त्रिदेभले वान भर्सेस वानको स्थितिमा गोल गर्न चुके । विशन गुरुङको पासमा त्रिदेभ ब्रिगेडका किपरलाई बिट गर्न असफल रहे ।
यस्तै ८६ औं मिनेटमा विजयको क्रसमा ब्रिगेडका रोशन राना मगर गोल गर्न चुके । त्यस्तै ९० औं मिनेटमा डिबक्स भित्रबाट विजयको प्रहार शेर्पाका गोलकिपर किशोरले पन्च गर्दै बाहिर फाल्दा ब्रिगेड अग्रता दोब्बर बनाउनबाट चुकेको थियो ।
यस्तै खेलको अन्तिम केहि मिनेट शेर्पा १० खेलाडीमा सिमित भएको थियो । शेर्पाका निरज बस्नेत दोहोरो पहेलो कार्डसहित रातो कार्ड खादै मैदानबाट बाहिरिएका थिए ।
खेलमा ब्रिगेडका गोलकिपर विशाल म्यान अफ दि म्याच चुनिए ।
यस खेलसँगै ब्रिगेडले 'ए' डिभिजन लिगमा आफ्नो १ सय खेल पुरा गरेको छ ।
२०६१ सालमा 'ए' डिभिजन लिगमा बढुवा भएको ब्रिगेडको यस खेल लिगमा १ सय खेल हो ।
जितसँगै ब्रिगेडले ४ खेलमा ६ अंक जोडेको छ । ब्रिगेड लिगको छैटौं स्थानमा रहेको छ ।
शेर्पाले ४ खेलमा २ अंक जोडेको छ । शेर्पा लिगको ११ औं स्थानमा रहेको छ ।
के भन्छन् प्रशिक्षक ?
जितपछि ब्रिगेडका प्रशिक्षक खगेन्द्र पुनले जित सहित ऐतिहासिक खेल स्मरणीय बनाउने योजना सफल भएको बताए ।
'खेल जित्दै इतिहासलाई स्मरणीय बनाउनु पर्छ भन्ने योजना थियो । सबै खेलाडीले राम्रो खेल्दा सम्भव भयो,' उनले भने, 'खेलमा पाएका केहि अवसर सदुपयोग गर्न सकेनौ । हाम्रो लक्ष्य लिगको शीर्ष ६ मा रहने हो ।'
शेर्पाका प्रशिक्षक सन्जिब बुढाथोकीले खेलाडीले राम्रो प्रदर्शन गरेपनि गोल निकाल्न नसकेको बताए ।
'पहिलो हाफ सोचेजस्तो भएन । दोस्रो हाफ राम्रो भयो तर, स्कोर निकाल्न सकेनौ,' उनले भने, 'अब आउने खेलमा जित्नेगरी खेल्छौ । आज ब्रिगेडले राम्रो खेल्यो ।'
शेर्पा प्लेईङ सेट -
किशोर गिरि, मान बहादुर तामाङ, विजय श्रेष्ठ, त्रिदेभ गुरुङ,निरज बस्नेत, रबि थापा मगर, आशिष गुरुङ, विशन गुरुङ, कैलाश बस्नेत, विनोद गुरुङ, स्टेफेन समिर
ब्रिगेड प्लेईङ सेट -
अनिल गुरुङ, जया गुरुङ,मनोज राई, पदम भण्डारी, रोशन राना मगर,रन्दिप पौडेल, शिशिर लेखी, विजय गुरुङ, विशाल सुनार, उत्तम गुरुङ, बुसारी
