काठमाडौं । सहिद स्मारक 'ए' डिभिजन लिग फुटबलमा थ्री स्टार क्लबले जित निकालेको छ ।
शनिबार भएको खेलमा थ्री स्टारले एपीएफ क्लबलाई १-० गोल अन्तरले हराएको हो ।
त्रिपुरेश्वरस्थित दशरथ रंगशालामा थ्री स्टारलाई जित दिलाउन अनन्त तामाङले निर्णायक गोल गरे । खेलको १५ औं मिनेटमा अनन्तले निर्णायक गोल गरे ।
दायाँ भागको कर्नर साइडबाट मिक्छेन तामाङको फ्रिकिकलाई अनन्तले हेडबाट पोस्टको दिशा दिएका थिए । सुशान्त श्रेष्ठलाई एपीएफका डिफेन्डरले फउल गर्दा थ्री स्टारले फ्रिकिक पाएको थियो ।
खेलमा म्यान अफ दि म्याच अनन्त चुनिए ।
यससँगै थ्री स्टारले लिगमा दोस्रो जित निकालेको छ । र, थ्री स्टारले ३ खेलमा ७ अंक जोडेको छ ।
थ्री स्टार लिगको दोस्रो स्थानमा समेत उक्लिएको छ ।
यस अघि पहिलो खेलमै जावलाखेलसँग गोलरहित बराबरीमा रोकिएको थ्री स्टारले दोस्रो खेलमा पुलिस क्लबमाथि १-० को कठिन जित निकालेको थियो ।
एपीएफको यो दोस्रो हार हो । लिगको १२ औं स्थानमा रहेको एपीएफको १ अंक रहेको छ । पहिलो खेलमा साविक विजेता मनाङ मर्स्याङ्दीसँग २-० ले पराजित एपीएफले हिमालयन शेर्पासँग १-१ गोलको बराबरी खेलेको थियो ।
थ्री स्टार हाबी
एपीएफविरुद्ध साँघुरो जित निकालेपनि खेलमा थ्री स्टार हाबी रह्यो । बल पोजिसनमा पकड र आधा दर्जन पोस्ट आक्रमण गरेपनि थ्री स्टार थप गोल गर्न भने सकेन ।
एपीएफविरुद्ध थ्री स्टारले सुरुवातबाटै आक्रामक खेल पस्किएको थियो । खेलको चौथो मिनेटमै थ्री स्टारका दिपेश घलेले डिबक्स भित्रबाट मिलाएको क्रसमा सुशील राईको हेड एपीएफका गोलरक्षक अमृत कुमार चौधरीले पन्च गर्दै बाहिर फालेका थिए ।
खेलको आठौं मिनेटमा एपीएफले गोलको सुनौलो मौका गुमायो । नविन लामाले डिबक्स भित्रबाट हानेको प्रहार थ्री स्टारका कप्तान बिक्रम लामाले क्लियर गरे ।
१० औं मिनेटमा थ्री स्टारले गोलको सुनौलो अवसर गुमाएको थियो । एपीएफका डिफेन्डर राजन गुरुङबाट बल खोस्दै मिक्छेन तामाङले मिलाएको पासमा वान भर्सेस वानको स्थितिमा रहेका विदेशी खेलाडी हाजमातले बाहिर प्रहार गरे ।
३० औं मिनेटमा मिक्छेन तामाङको कर्नरमा कप्तान बिक्रम लामाको हेड दोस्रोबार नजिकैबाट बाहिरियो । यस्तै ३७ मिनेटमा दिपेश घलेको प्रहार क्रसबारमा लागेर फर्कदा थ्री स्टार अग्रता दोब्बर बनाउनबाट चुकेको थियो ।
पहिलो हाफको तुलनामा दोस्रो हाफमा एपीएफले सुधारिएको प्रदर्शन गर्यो ।
दोस्रो हाफको सुरुवातमै नवीन लामाले २० यार्डबाट हानेको फ्रिकिक क्रसबार माथिबाट बाहिरियो । यस्तै ६७ औं मिनेटमा राजिब लोप्चाङको पासमा आशिष लामाको हेड थ्री स्टारका विदेही गोलरक्षक प्रिसोले सहजी बचाए ।
यता, खेलको ७४ औं मिनेटमा थ्री स्टारका सुशील राईले मिलाएको पासमा डिबक्स बाहिरबाट कप्तान बिक्रमको कडा प्रहार एपीएफका गोलरक्षक अमृतले पन्च गर्दै बाहिर पठाएका थिए ।
यस्तै ८५ औं मिनेटमा थ्री स्टारले अर्को अवसर गुमायो । मिक्छेनले करिब २२ यार्डबाट प्रहार गरेको फ्रिकिक एपीएफका गोलरक्षक अमृतले थाहा नपाउदै क्रसबारमा लागेर फर्किएको थियो ।
त्यसपछि ८९ औं मिनेटमा आशिष लामाले मैदानको ३५ यार्डबाट हानेको फ्रिकिक दोस्रो बारको केही इन्चबाट बाहिरिदा एपीएफ बराबरी गर्न चुकेको थियो ।
के भन्छन् प्रशिक्षक ?
एपीएफमाथि जित हात पारेपनि थ्री स्टारका प्रशिक्षक मेघराज केसी खुसी देखिएनन् । प्रशिक्षक केसीले पाएको अवसर सदुपयोग गर्न समेत नसकेको बताए ।
'खेल प्रतिस्पर्धात्मक भयो । गोल सोचेजस्तो भएन । हाम्रो स्ट्राइक लाइनमा समस्या छ । पाएको अवसर सदुपयोग गर्न सकेनौ,' उनले भने ।
एपीएफका प्रशिक्षक राजेन्द्र तामाङले जित्ने लक्ष्य भएपनि आफ्ना खेलाडी ठुला क्लबसँग डराएको कारण हार व्यहोर्नु परेको बताए ।
'हामी जित्ने हिसाबले आएका थियौं । नत्र बराबरी खेल्ने लक्ष्य थियो तर, भएन,' उनले भने, 'क्लबको नामसँग खेलाडी डराए जस्तो भयो । अन्तर्राष्ट्रिय खेलाडी नहुँदा मनोबल गिरेको जस्तो देखियो ।'
थ्री स्टार प्लेईङ सेट -
अनन्त तामाङ, सुशन श्रेष्ठ,बिक्रम लामा,प्रविन कुमार सैंजु,प्रिसो, एरिनोसो,हाजमत,मिक्छेन तामाङ,दिपेश घले,सुशिल राई,अशोक खवास
एपीएफ प्लेईङ सेट -
राम कुमार कुमाल,अमृत कुमार चौधरी,सुदिप शिख्राकार,नबिन लामा,रमेश दंगाल,आशिस लामा,राजन गुरुङ,बुद्धि मान राई,टोप बहादुर बिष्ट,प्रदिप लामा,राजिब लोप्चन
